Oskar De la Hoııa: «Leme Golovkındi nokaýtqa jiberedi»
ASTANA. QazAqparat - «Golden Boy» promoýterlik kompanııasynyń basshysy Oskar de la Hoııa IBF nusqasy boıynsha chempıon Davıd Leme WBA nusqasy boıynsha álem chempıony Gennadıı Golovkındi jeńedi degen pikirin aıtty, dep jazady sports.kz.
«Bul kezdesýdiń ol úshin mańyzy zor. Ol kelesi kezeńge ótý úshin osy jekpe-jekti kútti. Iá, ońaı bolmaıdy. Biraq Davıd jeńiske jete alady. Barlyǵy Golovkındi únemi jeńgen sátterin, basymdyǵyn kórip úırenip qaldy. Biraq ol Davıdpen olaı jasaı almaıdy. Davıd bul jekpe-jekte Golovkındi nokaýtqa túsiretinine senimdimin. Golovkın osyǵan deıin Leme sııaqty myqty ári aqyldy boksshymen jekpe-jekke shyǵyp kórgen joq», - dedi ol.
Aıta keteıik, Golovkın men Leme 17 qazanda Nıý-Iorkte Madison Square Garden arenasynda kúsh synasady.
