OSK Ýálıhan Qaısarovty Prezıdenttikke kandıdat retinde Konstıtýtsııa men «Saılaý týraly» zań talaptaryna sáıkes emes dep tapty
ANA. 9 aqpan. QazAqparat /Aıdar Ospanalıev/ - Ortalyq saılaý komıssııasy Ýálıhan Qaısarovty Qazaqstan Respýblıkasynyń Prezıdenttigine kandıdat retinde Konstıtýtsııa men «QR Saılaý týraly» konstıtýtsııalyq zań talaptaryna sáıkes emes dep taýyp, tıisti qaýly qabyldady.
Ortalyq saılaý komıssııasynyń otyrysynda baıandama jasaǵan OSK-nyń hatshysy Baqyt Meldeshovtiń aıtýynsha, 6 aqpan kúni Ýálıhan Qaısarov Ortalyq saılaý komıssııasyna ózin-ózi usynyp ótinish berdi. «Biz tez arada osy ótinishi men negizgi qujattaryn tıisti memlekettik organdarǵa jiberip, ol organdardan jaýaptar aldyq. Sol jaýaptarǵa sáıkes, Ý.Qaısarov Ádilet mınıstrligi bergen jeke kýáligi boıynsha Qazaqstan Respýblıkasynyń azamaty bolyp tabylady. Ol 1965 jyldyń 7 qazanynda Qaraǵandy oblysynda týylǵan. QR Ádilet mınıstrligi jáne Іshki ister mınıstrligi usynǵan anyqtamalarǵa sáıkes, Ý.Qaısarov Qazaqastanda 45 jyl turady. Osyǵan qaraı belsendi saılaý quqyǵyna ıe»,- dedi B.Meldeshov.
Onyń aıtýynsha, Bas prokýratýranyń Quqyqtyq statıstıka jáne arnaıy esepke alý jónindegi komıtetinen kelip túsken qujatqa saı, Ý.Qaısarov buryn sottalmaǵan. Sybaılas jemqorlyq áreketterine de qatysy joq. «Keshe atalmysh kandıdat Prezıdenttikke kandıdattardyń memlekettik tildi meńgerýin anyqtaý jónindegi lıngvıstıkalyq komıssııasynyń synynan óte almady. Sol sebepti kandıdat Ý.Qaısarov Konstıtýtsııa men «QR Saılaý týraly» konstıtýtsııalyq zańnyń talaptaryna sáıkes emes dep tanyldy», - dedi OSK-nyń hatshysy.
