OSK tóraǵasy TMD baıqaýshylary mıssııasynyń ókilderimen kezdesti
TANA. 18 tamyz. QazAqparat /Aıdar Ospanalıev/ - Búgin Ortalyq saılaý komıssııasynyń tóraǵasy Qýandyq Turǵanqulov Táýelsiz memleketter dostastyǵy elderinen kelgen baıqaýshylar mıssııasynyń basshysy Sergeı Lebedev bastaǵan delegatsııamen kezdesti.
Kezdesý barysynda baıqaýshylardy 19-shy tamyz kúni elimizde ótetin Senat depýtattarynyń saılaýynyń barysymen tanystyrǵan OSK tóraǵasy baıqaýshylarǵa qazaqstandyqtardyń shaqyrýyn qabyl alǵany úshin alǵysyn bildirdi. «Táýelsiz memleketter dostastyǵynyń mısssııasy Qazaqstandaǵy barlyq saılaý sharalaryna qatysyp kele jatqan jalǵyz halyqaralyq uıym. Osyǵan qaraı Qazaqstannyń saılaý zańnamalaryna engizilgen ózgeristerdiń basym bóligi osy TMD baıqaýshylarynyń aqyl-keńesterine negizdelgen»,-dedi Q.Turǵanqulov.
Óz kezeginde Ortalyq saılaý komıssııasynyń ókilderine Senat depýtattarynyń saılaýyn baqylaýǵa shaqyrtýy úshin alǵysyn bildirgen TMD baıqaýshylary mıssııasynyń basshysy S.Lebedev saılaýdy baqylaýdyń mańyzdy shara ekendigin atap kórsetti. «Bizdiń basty maqsatymyz sizdermen birge saılaýdyń barynsha ashyq ótip, qazaqstandyqtardyń erkin taýdaý jasaýlaryna yqpal etý. Biz úshin Qazaqstannyń da TMD-ǵa múshe ózge memleketterdiń de saılaý zańnamalary jetildirilip otyratyndyǵy qýantady. Biz álemdik qaýymdastyq moıyndaǵan talaptarǵa jaqyndap qaldyq. Keı jaǵdaıda tipti birqatar memleketterdiń aldyna shyǵyp otyrmyz. Eń bastysy biz alǵa jyljýdamyz»,-dedi S.Lebedev.
Onyń sózine qaraǵanda, TMD mıssııasynyń ókilderi elimizde 11-shi tamyzdan bastap jumys isteýde. Mıssııa quramyna TMD-nyń 8 memleketinen 68 adam kirgen. «TMD-ǵa múshe 11 memleketten tek Moldova men Ázirbaıjan elderiniń ókilderi ǵana kele almaı qaldy. Mıssııa quramynda dıplomattar men qoǵam qaıratkerleri, Parlament depýtattary, Ortalyq saılaý komıssııalarynyń músheleri bar. Mıssııa ókilderiniń barlyǵy saılaý sharalarynan kóp jyldyq mol tájirıbeleri bar azamattar», dedi mıssııa basshysy.
