OSK tóraǵasy saıası partııalardyń jaýapkershiligin túsindirdi
Atap aıtqanda, búgin QR Ortalyq saılaý komıssııasy men Qoǵamdyq damý mınıstrliginiń birlesken otyrysy ótti.
«Ózderińiz biletindeı, saılaý zańnamasyna ózgerister men tolyqtyrýlar engizilgen, olardyń ishindegi eń mańyzdysy - máslıhat depýtattarynyń saılaýyn ótkizgen kezinde proportsıonaldy saılaý júıesine aýysý. Bul saıası partııalardyń quqyqtaryn birshama keńeıtedi jáne jaýapkershiligin kúsheıtedi, sebebi rezervti eskere otyryp, máslıhat depýtattyǵyna kandıdattardyń tizimderin qalyptastyrýmen saıası partııalar aınalysatyn bolady. Bul rette máslıhattar ókilettikteriniń tutas kezeńinde atalmysh tizimniń zańdy kúshi bolady», - dep toqtaldy QR Ortalyq saılaý komıssııasynyń tóraǵasy Berik Imashev.
Onyń sózine qaraǵanda, osy normalar aldaǵy jyldyń 1 qańtarynan bastap qoldanysqa engiziledi. Bul jerde bir mańyzdy jaıtty atap kórsetý qajet. Eger daýys berýge qatysqan saılaýshylar daýystarynyń jeti paıyzyn tek bir saıası partııa alǵan bolsa, onda depýtattyq mandattardy bólýge saılaýshylardyń eń kóp daýysyna ıe bolǵan kelesi partııanyń partııalyq tizimi de jiberiledi. Bul turǵyda ekinshi saıası partııa keminde bir mandat alady. Osylaısha, qoldanystaǵy saılaý zańnamasy saıası partııalar arasyndaǵy naqty básekelestiktiń deńgeıin arttyrýǵa obektıvti túrde yqpal etedi.
«Sonymen qatar, jumys istep jatqan saılaý komıssııalarynyń ókilettik merziminiń aıaqtalýyna jarty jyldan az qaldy. Osyǵan baılanysty, «Saılaý týraly» Konstıtýtsııalyq zańǵa saı máslıhattar saıası partııalardyń usynystary boıynsha saılaý komıssııalarynyń jańa quramyn qalyptastyrýdy bastaıdy. 2019 jyldyń qańtar aıynan bastap kásibı negizde jumys isteıtin aýmaqtyq saılaý komıssııalarynyń eki bosatylǵan múshesi týraly norma kúshine enetinine nazarlaryńyzdy aýdaramyn. Bul óte mańyzdy másele. Sol sebepti saıası partııalar jáne qoǵamdyq birlestikter, birinshiden, saılaý komıssııalarynyń quramyna usynylatyn kandıdatýralardy irikteýde óte jaýapty bolýlary tıis. Ekinshiden, partııalar men úkimettik emes uıymdar usynatyn saılaý komıssııalary músheleriniń tıisti biliktilik deńgeıi bolýy tıis», - dep naqtylady OSK tóraǵasy.
Foto: www.arnapress.kz
