OSK tóraǵasy reseılik jáne ýkraınalyq BAQ ókilderimen kezdesti
ASTANA. 18 tamyz. QazAqparat /Aıdar Ospanalıev/ - Búgin Ortalyq saılaý komıssııasynyń tóraǵasy Qýandyq Turǵanqulov Qazaqstanda ótetin Senat depýtattarynyń saılaýyn baqylaý maqastynda kelgen reseılik jáne ýkraınalyq buqaralyq aqparat quraldarynyń ókilderimen kezdesti.
Kezdesýde OSK tóraǵasy jýrnalısterdi elimizdiń saılaý zańnamalary men Senat depýtattarynyń saılaýyna daıyndyq barysymen tanystyrdy. «Biz úshin Senat depýtattarynyń saılaýy
óte mańyzdy shara. Biz erteń Parlamenttiń joǵarǵy palatasynyń jartysyn saılaımyz. Jalpy joǵarǵy palata 47 depýtattan turady. Olardyń 32-in máslıhattar saılaıdy. 15 depýtatty Prezıdent taǵaıyndaıdy. Depýtattardyń ókilettigi 6 jyl»,-dedi OSK tóraǵasy.
Onyń sózinshe, Qazaqstanda búginde 3 myń 335 depýtat bar. Al erteń barlyq deńgeıdegi máslıhat depýtattary saılaýshylardyń jıynynda bas qosady. Búginde 47 depýtattyń orny túrli sebeptermen bos turǵandyqtan, erteńgi jıynǵa 3 myń 228 depýtat qatysady dep kútilýde. «Senat depýtattyǵynan úmitkerler saılaýshylardyń 50 paıyzdan astam daýsyn jınaǵanda ǵana jeńiske jetken bolyp esepteledi. Senat depýtattarynyń saılaý naýqany óte belsendi ótip jatyr. Mysaly, saılaý naýqany bastalǵaly respýblıka boıynsha 98 úmitker tirkeldi. Bul ótken saılaýdaǵy kórsetkishten 10 adamǵa kóp»,-dedi Q.Turǵanqulov.
Sondaı-aq ol sózinde saılaýda ásirese «Nur Otan» partııasynyń ókilderi erekshe belsendilik tanytyp otyrǵandyǵyn atap kórsetti. «Senat depýtattyǵynan kandıdattardyń arasynda «Patrıottar partııasy», «Aýyl», «Rýhanııat», «Aq jol» sııaqty 4 partııanyń ókili bar. Jalpy alǵanda Senat depýtattarynyń saılaýyna 39 kandıdat tirkelgen. Qalǵan úmitkerler zańda kórsetilgen talaptardyń úddesine shyǵa almady»,-dedi OSK tóraǵasy.
Kezdesý barysynda Q.Turǵynqulov sheteldik aqparat quraldarynyń elimizdiń saılaý zańnamasyna, saılaý úderisine baılanysty saýaldaryna jaýap berdi.
