OSK tóraǵasy Q. Turǵanqulov TMD uıymy mıssııasy baıqaýshylarynyń basshysymen kezdesti
ASTANA. 31 naýryz. QazAqparat /Aıdar Ospanalıev/ - Búgin Ortalyq saılaý komıssııasynyń tóraǵasy Qýandyq Turǵanqulov pen atalmysh komıssııa músheleri Táýelsiz memleketter dostastyǵy uıymy mıssııasy baıqaýshylarynyń basshysy Sergeı Lebedev bastaǵan delegatsııamen kezdesti.
Júzdesý barysynda Ortalyq saılaý komıssııasynyń tóraǵasy mártebeli meımandardy 3 sáýirge taǵaıyndalǵan kezekten tys Prezıdent saılaýyna daıyndyq barysymen tanystyrdy. «Qazaqstannyń Ortalyq saılaý komıssııasy TMD mıssııasynyń baıqaýshylarymen alǵash ret jumys istep otyrǵan joq. Biz kóptegen jyldar boıy bilesip qyzmet etip kelemiz. TMD mıssııasynyń ókilderi Qazaqstandaǵy birde-bir saılaýdy jibergen joq. Osyǵan qaraı biz de TMD mıssııasynyń jumysymen jaqsy tanyspyz. Sizder saılaý barysynda oryn alatyn kemshilikterdi kórsetip otyrasyzdar. Al biz óz tarapymyzdan osy kemshlikterdi nazarǵa ala otyryp, olardy barynsha joıýǵa kúsh salamyz. Bul bizdiń yntymaqtastyǵymyzdyń arqasynda múmkin bolyp otyrǵan jaǵdaı»,-dedi OSK tóraǵasy.
Sondaı-aq sózinde saılaý naýqanynyń eń jaýapty, ári mańyzdy kezeńi jaqyndap kele jatqandyǵyn atap ótken OSK tóraǵasy elimizdegi barlyq saılaý komıssııalarynyń saılaýǵa erekshe ynta-yqylaspen daıyndalǵandyǵyn atap kórsetti. «Biz, árıne, saılaýdy barynsha, ashyq, jarııaly jáne halyqaralyq talaptarǵa saı etip ótkizýge kúsh salamyz. Biz bul baǵytta qajyrly eńbek ettik dep nyq senimmen aıta alamyn. Biz saılaýshylardyń tizimderimen de kóp jumys istedik. Ortalyq saılaý komıssııasy aımaqtyq saılaý komıssııalarymen birge oqytý semınarlaryn uıymdastyryp, qazir oqý jumystaryn aıaqtaýǵa taıaý qaldy. Osy saılaýdyń ereksheligi - biz saılaý ótkizý merzimin birshama qysqarttyq. Degenmen merzim saılaýda talapqa saı ótkizýge jetkilikti»,-dedi Q.Turǵanqulov.
Óz kezeginde S.Lebedev TMD mıssııasy baıqaýshylarynyń TMD keńistigindegi elderdiń barlyǵyndaǵy saılaýlarǵa qatysyp júrgendigin atap ótti. «Osyǵan qaraı mıssııaǵa múshe elder qatary da artyp otyr. Bul mıssııanyń qyzmeti men onyń bergen baǵasyna qalyń kópshilik nemquraıdy qaramaıtyndyǵyn, oǵan degen qyzyǵýshylyqtyń bar ekendigin kórsetedi. Bul meniń jeke pikirim emes. Bul sarapshylardyń pikirleri. TMD mıssııasynyń baıqaýshylary tek kemshilikterdi joıyp, saılaý qyzmetiniń zańǵa sáıkes joǵary deńgeıde ótýine yqpal etýdi basty maqsat etedi. Qoryta aıtqanda, bizdiń nıetimiz túzý»,-dedi mıssııa basshysy.
