OSK taǵy 15 halyqaralyq baıqaýshyny akkredıttedi
OSK hatshysy Muhtar Ermannyń aıtýynsha, halyqaralyq baıqaý ınstıtýty ashylǵannan beri 10 shet memleket pen 3 halyqaralyq uıymnan 82 baıqaýshy resmı tirkeýden ótken.
«Búgingi tańda Syrtqy ister mınıstrligi bir shet memleket pen bir halyqaralyq uıymnan 15 baıqaýshyny tirkeýden ótkizýge usyndy. Atap aıtqanda, Iran Islam Respýblıkasynan bir kandıdatýra, TMD baıqaýshylar mıssııasynan 14 kandıdatýra bar. Onyń ishinde Tájikstannyń Saılaý jáne referendým jónindegi ortalyq komıssıasynyń tóraǵasy Bahdıor Qudıorzada tirkeýge usynyldy. Baıandalǵandardy eskere otyryp, shet memleket pen halyqaralyq uıymdardyń baıqaýshylaryn akkerdıtteý týraly komıssııa qaýlysynyń jobasy daıyndaldy. Qoldaýlaryńyzdy suraımyz», - dedi ol.
Komıssııa músheleri atalǵan baıqaýshylardy akkredıtteý týraly qaýlyǵa qol qoıdy.
Eske salsaq, keshe Májilis pen máslıhat saılaýynyń úgit-nasıhat kezeńi bastaldy.
Sondaı-aq, Ortalyq saılaý komıssııasy partııalardyń ataýlary saılaý bıýleteninde qandaı tártippen ornalasatynyn jerebe arqyly anyqtaǵan bolatyn.
