OSK: Senat depýtattyǵynan úmitker 38 adam tirkeldi

ASTANA. QazAqparat - Senat depýtattyǵyna kandıdat retinde tirkelgenderdiń túpkilikti tizimi aıqyndaldy. Bul týraly búgin QR OSK Saılaý protsesin uıymdastyrý jáne OSK músheleriniń qyzmetin qamtamasyz etý bóliminiń meńgerýshisi Maqsathan Anapın málim etti, dep habarlaıdy QazAqparat.

«Búgin saǵat 00:00-de saılaý naýqanynyń úshinshi kezeńi, ıaǵnı saılaý aldyndaǵy úgit jumystary aıaqtalady. Qazirgi ýaqytta Senat depýtattyǵyna kandıdat retinde tirkelgenderdiń túpkilikti tizimi aıqyndaldy. Oblystyq, Astana men Almaty qalalary saılaý komıssııalarynyń usynǵan derekterine sáıkes, 38 úmitker tirkeldi»,-dedi M. Anapın 28 maýsymǵa taǵaıyndalǵan Senat depýtattaryn saılaý naýqanynyń barysy men daýys berý kúnine daıyndyq jónindegi QR Ortalyq saılaý komıssııasynyń otyrysynda.

«Bul Parlamenttiń joǵary palatasyna óte mańyzdy saılaý bolyp tabylady. Senattyń 16 depýtaty saılanady. Atap aıtqanda,38 kandıdattyń ishinen 16-sy qalady»,-dep atap ótti ol.

Belgili bolǵandaı, jergilikti BAQ-ta tańdaýshylardyń tizimderi jarııalandy. Olardyń málimetterine qaraǵanda, bos okrýgterdiń paıda bolýyna baılanysty elimizde 28 maýsymda saılaýǵa qatysatyn tańdaýshylardyń sany - 3293.

«Daýys berý men ótkizetin oryn jáne ýaqyty aıqyndaldy. Osy rette daýys berý Astana ýaqyty boıynsha saǵat 10:00-ge belgilendi. Bul pýnkter daýys berýge bir saǵat qalǵanda ashylady»,-dedi Maqsathan Anapın.

Budan buryn habarlanǵandaı, Senat saılaýyn 288 halyqaralyq baıqaýshyqadaǵalaıtyn bolady.