OSK Senat depýtattyǵyna kandıdattarǵa qoıylatyn talaptardy atady

ASTANA. QazAqparat - Aldaǵy saılaýda Senat depýtattyǵyna kandıdattarǵa qoıylatyn talaptar da joǵary bolady. Bul týraly búgin Ortalyq kommýnıkatsııalar qyzmetindegi brıfıngte Ortalyq saılaý komıssııasynyń tóraǵasy Qýandyq Turǵanqulov málim etti.

«Senator bolýǵa úmitker jasy 30-dan asqan, joǵary bilimi bar, jumys stajy bes jyldan kem bolmaıtyn, sondaı-aq sońǵy 10 jyl boıy elimizdiń aýmaǵynda, al sońǵy 13 jyl boıy ózi daýysqa túsetin óńirde turaqty turatyn Qazaqstan Respýblıkasynyń azamaty bolýy qajet. Bul oraıda birqatar mańyzdy máseleler bar. Birinshiden, Senat depýtattyǵyna kandıdat tıisti oblystaǵy máslıhat depýtattarynyń 10 paıyzynyń qoldaýyna ıe bolýy tıis. Ekinshiden, usynylǵan kandıdattardyń árqaısysy Ortalyq saılaý komıssııasynyń arnaıy shotyna depozıt retinde 300 myń teńgeden kem bolmaıtyn saılaý jarnasyn engizýi kerek», - dedi Qýandyq Turǵanqulov.

Onyń aıtýynsha, úmitker men onyń jubaıy salyq organdaryna óz tabysy jáne múlki jaıly deklaratsııa tapsyrýy tıis.

«Oblystyq jáne Astana men Almaty qalalyq saılaý komıssııalary daýys berý, daýystardy sanaý jáne onyń nátıjelerin jarııalaýdy bir kún ishinde 1 qazanda júrgizedi. Saılaý nátıjelerin Ortalyq saılaý komıssııasy 2014 jylǵy 7 qazannan keshiktirmeı belgileýi tıis», - dedi OSK basshysy.

Eske sala keteıik, Memleket basshysy «Qazaqstan Respýblıkasy Parlamenti Senatynyń depýtattaryn saılaýdy 2014 jylǵy 1 qazanǵa taǵaıyndaý týraly» Jarlyqqa qol qoıǵan bolatyn.