OSK Senat depýtattyǵyna kandıdattardyń saılaý qoryn bekitti

NUR-SULTAN. QazAqparat – Ortalyq saılaý komıssııasynyń hatshysy Sábıla Mustafına QR Parlamenti Senatynyń depýtattyǵyna kandıdattardyń saılaý qory týraly aqparatty túsindirdi, dep habarlaıdy QazAqparat tilshisi.

OSK otyrysynda sóz sóılegen Sábıla Mustafınanyń aıtýynsha Parlament Senatynyń depýtattyǵyna kandıdattyń saılaý qory:

- jalpy somasy zańnamamen belgilengen eń tómengi jalaqynyń eki júz ese mólsherinen aspaýy tıis kandıdattyń menshikti qarajaty. Bul - 8 500 000 (segiz mıllıon bes júz myń) teńge;

- jalpy somasy zańnamada belgilengen eń tómengi jalaqy mólsherinen bes júz eseden artyq aspaýǵa tıis Qazaqstan Respýblıkasynyń azamattary men uıymdarynyń erikti qaıyrmaldyqtary. Bul 21 250 000 (jıyrma bir mıllıon eki júz elý myń) teńgeni quraıdy.

«Belgilengen mólsherden tys túsken aqshalaı qarajat saılaý qoryna eseptelýge jatpaıdy. Olardy engizgen azamattar men uıymdarǵa qaıtarylady. Bul rette atalǵan qarajatty qaıtarýǵa baılanysty shyǵystar olardy engizgen azamattar men uıymdardyń esebinen jabylady», - dedi ol.

Aıta keteıik, osy jyldyń 12 maýsymynda Memleket basshysy Qasym-Jomart Toqaevtyń Senat depýtattarynyń saılaýyn 2020 jylǵy 12 tamyzǵa taǵaıyndaý týraly qaýlysy shyqqan edi.

Osyǵan oraı QR Ortalyq saılaý komıssııasynyń onlaın rejımde otyrysy ótip, onda saılaýǵa qatysty kúntizbelik is-sharlar jospary bekitilgen. 13 maýsymnan bastap Senat depýtattyǵyna kandıdattardy usyný bastaldy. Sondaı-aq úmitkerlerge qoıylatyn talaptar jarııa etildi.