OSK Senat depýtattyǵyna kandıdattardyń bıýdjetten óteletin shyǵystarynyń normatıvterin belgiledi

ASTANA. QazAqparat - Búgin QR Ortalyq saılaý komıssııasynyń otyrysynda QR Parlamenti Senatynyń depýtattyǵyna kandıdattardyń respýblıkalyq bıýdjet qarajatynan óteletin shyǵystarynyń normatıvteri belgilendi.

«Qazaqstan Respýblıkasyndaǵy saılaý týraly» konstıtýtsııalyq zańǵa sáıkes, Parlament Senaty depýtattarynyń saılaýy respýblıkalyq bıýdjetten qarjylandyrylyp, árbir kandıdatqa birdeı qarajat bólinýin memleket kepildendiredi. Osy maqsatqa respýblıkalyq bıýdjetten 2014 jylǵy saılaýǵa 136 mıllıon teńge qarastyrylǵan.

«Atalǵan qarajatqa kandıdattardyń respýblıkalyq telearna-radıodan sóz sóıleýi, merzimdi baspasózde eki materıalynyń shyǵýy qamtamasyz etiledi. Budan bólek, bıýdjetten kandıdattardyń tańdaýshylarmen kezdesýine úı-jaıdy jalǵa alýǵa, úgittik baspa materıaldaryn ázirleýge, kóliktik shyǵystarǵa qarajat qaralady», - dedi OSK tóraǵasynyń orynbasary Vladımır Foos.

Toqtala ketetin jaıt, kandıdattardyń árqaısysyna saılaý aldyndaǵy úgitti júrgizýge, kóliktik shyǵystardy óteýge bıýdjetten 395 myń teńge qarastyrylǵan. Onyń ishinde 115 000 - teledıdar boıynsha baǵdarlamamen 15 mınýttyq sóz sóıleýge, 60 000 teńge - radıodan 10 mınýttyq sóz sóıleýge, 105 000 teńge - baspa basylymdarynda kólemi 0,1 baspa tabaqtan eki materıal jarııalaýǵa, 20 000 teńge - tańdaýshylarmen kezdesý úshin úı-jaıdy jalǵa alýǵa, 25 000 teńge - úgittik baspa materıaldaryn shyǵarýǵa, sonymen qatar, 70 000 teńge oblystar úshin jáne 35 000 teńge Astana jáne Almaty qalalar úshin - kóliktik shyǵystarǵa jumsaý kózdeledi.

Esterińizge sala keteıik, Elbasy Jarlyǵyna sáıkes, aǵymdaǵy jyldyń 1 qazanynda QR Parlamenti Senatynyń depýtattaryn saılaý ótedi.