OSK Senat depýtattyǵyna kandıdattardy saılaýdan shettetetin máselelerdi atady

ASTANA. QazAqparat - Búgin Ortalyq kommýnıkatsııalar qyzmetinde 1 qazanda ótetin Senat depýtattarynyń saılaýyna arnalǵan brıfıngte Ortalyq saılaý komıssııasynyń hatshysy Baqyt Meldeshov kandıdattardy saılaýdan shettetetin birqatar máselelerdi atap ótti.

«Jalpy Senat depýtattaryn saılaý naýqany kandıdattardy usyný, olardy tirkeý, úgit-nasıhat jumystary, sosyn daýys berý sekildi úderisterden turady. Al osy protsesterdiń kez kelgen satysynda kandıdattar tarapynan zań buzýshylyqtar oryn alsa, olar saılaýdan shettetiledi. Máselen, kandıdattardy usyný barysynda erejeler, normalar buzylýy yqtımal, kandıdattyń Konstıtýtsııaǵa, konstıtýtsııalyq zańdarǵa sáıkes kelmeýi de múmkin. Al kandıdattardy tirkeý barysynda tabys pen múlkine qatysty aqparattar tolyq nemese jetkiliksiz berilse, olardy tirkeýden bas tartylady», - dedi B. Meldeshov.

Onyń sózine qaraǵanda, máslıhattardyń ózderi kandıdattardy saılaýǵa túsýge usynyp, keıinnen olardy qaıtadan shaqyrtyp jatady. Úgit-nasıhat kezeńinde de zań buzshýlyqtar jıi oryn alýy yqtımal. Sonymen qatar, saılaýǵa túsetin kandıdattyń saılaýaldy baǵdarlamasyna da basa mán bergen mańyzdy. «Sot arqyly máslıhat depýtattaryn paraǵa jyǵý faktileri anyqtalsa, saılaýaldy úgitinde basqa kandıdattyń ar-namysyna, iskerlik bedel abyroıyna nuqsan keltiretin áreketterge barsa, bulardyń bári sol kandıdattyń saılaýdan shettetilýine sebep bolady. Jalpy, Senat depýtattyǵyna kandıdattar zańnama normalaryna qaıshy áreketterge baryp jatsa, olar tirkeýden alynyp, saılaýdan tys qalady», - dedi B. Meldeshov.

Eske sala keteıik, Memleket basshysy «Qazaqstan Respýblıkasy Parlamenti Senatynyń depýtattaryn saılaýdy 2014 jylǵy 1 qazanǵa taǵaıyndaý týraly» Jarlyqqa qol qoıǵan bolatyn.