OSK saılaýda KHA atynan depýtattyqqa úmitkerlerdiń shyǵyndaryn bekitti

NUR-SULTAN. QazAqparat – Ortalyq saılaý komıssııasy saılaýda Qazaqstan halqy Assambleıasy atynan depýtattyqqa úmitkerlerdiń bıýdjet esebinen jabylatyn shyǵyndaryn bekitti, dep habarlaıdy QazAqparat tilshisi.

«Saılaý zańnamasyna sáıkes, memleket kandıdattarǵa óz baǵdarlamalarymen BAQ-qa shyǵý úshin qarajattyń teń bólinýine kepildik beredi. Úmitkerlerdiń buqaralyq aqparat quraldaryna shyǵýy úshin qarajat bólý tártibi men kólemin Ortalyq saılaý komıssııasy aıqyndaıdy. Qaýlyǵa sáıkes, BAQ-ta óz baǵdarlamalarymen sóz sóıleý úshin úmitkerge qarajat bólý kózdelgen. Qarajat myna maqsatta bólinedi: teledıdarda - 15 mınýt, radıoda-10 mınýt, merzimdi baspasóz basylymdarynda nemese jelilik basylymdarda eki maqala jarııalaý úshin - 0,1 baspa paraǵynan artyq bolmaýy kerek», - dedi búgingi otyrysta Ortalyq saılaý komıssııasynyń hatshysy Sabıla Mustafına.

Onyń aıtýynsha, saılaý týraly konstıtýtsııalyq zańǵa sáıkes, respýblıkalyq bıýdjet qarajatynan kandıdattardyń saılaý aldyndaǵy jarııa is-sharalardy ótkizýge, úgit materıaldaryn shyǵarýǵa arnalǵan shyǵyndary, Ortalyq saılaý komıssııasy belgileıtin mólsherde kólik shyǵyndary óteledi.

«Ortsaılaýkom músheleri QHA músheleri daýys beretin Májilis saılaýynda respýblıkalyq bıýdjet qarajatynan óteletin kandıdattardyń shyǵyndar mólsherin belgileý týraly qaýly qabyldady. Qaýlyda kandıdattyń 870 000 teńge kóleminde, onyń ishinde: teledıdar men radıoda baǵdarlamalarmen sóz sóıleýge, sondaı-aq merzimdi baspa basylymdarynda 2 maqala jarııalaýǵa - 590 000 teńge somasynda, saılaý aldyndaǵy jarııa is-sharalardy ótkizýge jáne úgit materıaldaryn shyǵarýǵa - 130 000 teńge somasynda, kólik shyǵystaryna - 150 000 teńge somasynda shyǵyndar belgilengen», - dedi ol.