OSK saılaý zańnamasyn túsindirý boıynsha jalǵyz jáne túpkilikti sýbekti emes - Erlan Daýylbaev

NUR-SULTAN. QazAqparat - QR Ortalyq saılaý komıssııasy saılaý zańnamasyn túsindirýdiń túpkilikti sýbekti emes. Bul týraly QR OSK múshesi Erlan Daýylbaev aıtty, dep habarlaıdy QazAqparat tilshisi.

Onyń aıtýynsha, Ortalyq saılaý komıssııasy saılaý týraly zańnamaǵa óz betinshe túsinikteme berýge; óz betinshe qandaı da bir túsindirýler jasamaı, saılaý týraly zańnamany túsindirýdi uıymdastyrýǵa; saılaý zańnamasynyń jekelegen erejelerin ózge zańdar turǵysynan túsindirý úshin basqa memlekettik organdarǵa júginýge quqyǵy bar.

«Osy úsh aspektini eskere otyryp, mynadaı qorytyndy jasaýǵa bolady. OSK saılaý zańnamasyn túsindirý boıynsha jalǵyz jáne túpkilikti sýbekti emes, kerisinshe «úılestirýshi» nemese «uıymdastyrýshy» rólin atqarady. OSK-nyń saılaý zańnamasyn túsindirý aıasynda «Quqyqtyq aktiler týraly» Zań komıssııaǵa óziniń normatıvtik quqyqtyq qaýlylaryn ǵana resmı túsindirý jóninde ókilettikter beredi», - dedi Erlan Daýylbaev komıssııa otyrysynda.

Sonymen qatar ol uıymdastyrýshy rólinde bola otyryp, OSK óziniń normatıvtik quqyqtyq qaýlylary boıynsha resmı túsindirme berý úshin ýákiletti memlekettik organdardyń ustanymyn aldyn ala suratýǵa quqyly ekenin basa aıtty.

«Bul rette, OSK zańdardyń, sonyń ishinde saılaý týraly Konstıtýtsııalyq zańnyń normalaryna resmı túsindirme berýge quqyly emes. OSK apparaty óz quzyreti sheginde saılaýǵa baılanysty qoǵamdyq qatynastardy retteıtin normatıvtik quqyqtyq aktilerge tek naqty sýbektilerge qatysty nemese naqty jaǵdaıǵa qatysty beıresmı túsinikteme bere alady», - dedi QR OSK múshesi.