OSK: Saılaý ýchaskelerinde múmkindigi shekteýli azamattarǵa barlyq jaǵdaı jasalady
ASTANA. KAZINFORM — Qazaqstanda Quryltaı depýtattaryn saılaý qarsańynda barlyq saılaý ýchaskesi múgedektigi bar azamattar úshin qoljetimdi bolady. Bul týraly Ortalyq saılaý komıssııasynyń otyrysynda aıtyldy.
Komıssııa múshesi Lázzat Súıindiktiń aıtýynsha, daýys berý kúni barlyq saılaý ýchaskesi múmkindigi shekteýli azamattardyń kedergisiz kelip daýys berýine qajetti jaǵdaı jasalady.
— QR Ortalyq saılaý komıssııasy múgedektigi bar azamattardyń saılaý quqyqtaryn qamtamasyz etý boıynsha keshendi sharalardy iske asyryp jatyr. 2021 jyldan bastap OSK otyrystarynyń tikeleı kórsetilimderi men barlyq aqparattyq beınematerıal ymdaý tiline aýdarylady. 2022 jyldan beri daýys berý bıýlletenderine arnalǵan Braıl qarpindegi trafaretter ázirlenip júr. Barlyq saılaý ýchaskesi bıýlletendi toltyrý tártibi boıynsha aýdıonusqaýlyqtarmen qamtamasyz etiledi, — dedi ol.
Sonymen qatar, ol 2025 jyldan beri «Shyraq» múgedek áıelder qaýymdastyǵy men Astanadaǵy EQYU Baǵdarlamalar ofısiniń qoldaýymen saılaý komıssııalary múshelerine arnalǵan arnaıy beıneoqytý kýrsy qoldanylyp júrgenin atap ótti.
— Jergilikti atqarýshy organdar ınvataksı qyzmetin uıymdastyryp, saılaý ınfraqurylymynyń qoljetimdiligin tekserýge múgedektigi bar adamdardyń qoǵamdyq birlestikterin tartýy qajet, — dedi komıssııa múshesi.
Aıta keteıik, Quryltaı saılaýynda jeti partııadan 546 kandıdat baq synaıdy.
