OSK saılaý kúni saılaýshylardyń daýys berý nátıjeleri týraly málimetterdi ár 2 saǵat saıyn jarııalap otyrady
ASTANA. 2 sáýir. QazAqparat /Aıdar Ospanalıev/ - Búgin QR Ortalyq saılaý komıssııasynyń tóraǵasy Qýandyq Turǵanqulov pen atalmysh komıssııa músheleri 3 sáýirge taǵaıyndalǵan kezekten tys Prezıdent saılaýynyń baıqaýshylarymen kezdesti.
Kezdesý barysynda OSK tóraǵasy olardy kezekten tys saılaýǵa ázirliktiń barysymen tanystyrdy. Sondaı-aq Q.Turǵanqulov baıqaýshylarǵa kezekten tys saılaýdyń erekshelikteri jóninde baıandap, daýys berý kúni atqarylýy tıis máseleler jóninde habardar etti. «Memlekette ótken árbir saılaý sol eldiń saılaý zańnamalaryna tıisti ózgeris engizip otyrady. Sondyqtan baıqaýshylarmen birge jumys isteý, olardyń usynys, pikirlerin tyńdaý - biz úshin qashan da qurmet. Sizderdiń bizdiń atqarǵan isterimizge bergen baǵalaryńyz jaqsy qoldaý bolatynyna senimdimin», - dedi Q.Turǵanqulov.
OSK tóraǵasynyń sózine qaraǵanda, daýys berý sharasy azandaǵy 7-00-den bastalyp, keshki 20-00-ge deıin jalǵasady. Budan soń tańǵy saǵat 10-30-dan bastap, OSK músheleri saılaýshylardyń daýys berý nátıjelerin árbir 2 saǵat saıyn jarııalap otyrady. «Sondaı-aq biz sáýirdiń 4-i kúni túske deıin daýys berý nátıjelerine baılanysty aldyn al qorytyndy málimetterdi jarııalaımyz. Odan ári ózge de rásimder jalǵasady»,- dedi OSK tóraǵasy.
