OSK saılaý kezinde qoǵamdyq pikirge saýalnama júrgizý tártibin túsindirdi

NUR-SULTAN. QazAqparat – Ortalyq saılaý komıssııasynyń múshesi Anastasııa Şegortsova saılaý aldyndaǵy úgit-nasıhat jumysy barysynda qoǵam pikirine kimder jáne qalaı saýalnama júrgize alatynyn túsindirdi, dep habarlaıdy QazAqparat tilshisi.

«Qoǵamdyq pikirge saýalnama júrgizýdi Qazaqstan Respýblıkasynyń zańnamasyna sáıkes tirkelgen, qoǵamdyq saýalnama júrgizýde keminde 5 jyldyń tájirıbesi bar zańdy tulǵalar júrgize alady. Olar tıisti qujattardyń kóshirmelerin qosa bere otyryp, bul týraly Ortalyq saılaý komıssııasyn jazbasha túrde aldyn ala habardar ete otyryp, júrgizýge quqyly», - dedi Anastasııa Şegortsova Ortalyq saılaý komıssııasynyń otyrysynda.

Ortalyq saılaý komıssııasyna jiberiletin habarlamada saýalnama júrgizýge qatysatyn jáne osy salada jumys tájirıbesi bar mamandar týraly, qoǵamdyq saýalnama júrgiziletin óńirler, taldaý jumysynyń amaldary jaıly málimetter kórsetilýi kerek.

«Qoǵamdyq saýalnamanyń nátıjesin jarııalaǵan BAQ sol saýalnamany júrgizgen zańdy tulǵanyń esimin, saýalnamany kim júrgizip, oǵan kimniń tapsyrys bergenin, saýalnama júrgizilgen ýaqytty, málimetterdi jınaý ádisterin, saýalnamaǵa qatysqandardyń sanyn ataý kerek», - dedi ol.