OSK saılaý aldynda saýalnama júrgizetin 5 uıymdy atady
ASTANA. KAZINFORM — Ortalyq saılaý komıssııasyna saılaýǵa baılanysty qoǵamdyq pikirge saýal júrgizý týraly 5 zańdy tulǵadan habarlama kelip tústi.
OSK málimetinshe, saýalnama júrgizýge ruqsat alǵan uıymdar tıisti qujattardyń kóshirmelerin usynǵan.
Qoǵamdyq pikirdi zertteýmen aınalysatyn uıymdar qatarynda:
- «Eýrazııalyq ıntegratsııa ınstıtýty» JShS — jappaı saýalnama, fokýs-toptyq pikirtalas, saraptamalyq saýalnama, jedel saýalnama jáne exit poll ádisterin qoldanady;
- «DATAMETRICS» JShS — face-to-face suhbat júrgizedi;
- «Qoǵamdyq saıasat ınstıtýty» jeke menshik mekemesi — betpe-bet suhbat, telefon arqyly saýalnama, ınternet-saýalnama jáne exit poll ádisterin paıdalanady;
- «Instıtýt kompleksnyh sotsıalnyh ıssledovanıı — Astana» jeke qory — daýys berý oryndarynan tys saýalnama, úzdiksiz aǵyn ádisimen exit poll, jeke suhbat jáne onlaın saýalnama júrgizedi;
- «Qazaqstandyq qoǵamdyq damý ınstıtýty» KEAQ — face-to-face suhbat, telefon arqyly saýalnama jáne exit poll ótkizedi.
Zańǵa sáıkes, buqaralyq aqparat quraldary men onlaın-platformalar saýalnama nátıjelerin jarııalaǵan kezde zertteý júrgizgen uıymdy, tapsyrys berýshini, saýalnama ýaqytyn, aqparat jınaý ádisin, suraqtyń naqty tujyrymyn, qatysýshylar sanyn jáne qatelik koeffıtsıentin kórsetýge mindetti.
Sonymen qatar saılaý aldyndaǵy sońǵy bes kúnde jáne daýys berý kúni qoǵamdyq pikir saýaldarynyń nátıjelerin, saılaý qorytyndysyna qatysty boljamdardy jarııalaýǵa tyıym salynady.
Saılaý kúni daýys berý oryndarynda qoǵamdyq pikirge saýalnama júrgizýge de ruqsat etilmeıdi. Bul talaptardy buzý ákimshilik jaýapkershilikke ákelýi múmkin.
Eske salaıyq, buǵan deıin Bas prokýratýra saılaý qarsańynda qazaqstandyqtarǵa zań talaptaryn eske salǵan edi.
