OSK saıası partııalardyń ókilderine keńesshi daýys berý quqyn túsindiretin arnaıy hat daıyndaýdy qajet dep tapty

Bul týraly búgin Ortalyq saılaý komıssııasynyń otyrysynda atalmysh komıssııa tóraǵasynyń orynbasary Vladımır Foos málim etti.

Onyń sózine qaraǵanda, bıylǵy jyldyń 21 aqpanynda Ortalyq saılaý komıssııasy aýmaqtyq saılaý komıssııasynyń ókilderimen jáne saılaý sharalaryna atsalysatyn memlekettik organ ókilderimen arnaıy semınar uıymdastyrǵan. «Osy sharanyń barysynda keńesshi daýys berý quqy bar saıası partııa ókilderiniń mártebesine qatysty túsindirý qajet máselelerdiń bar ekendigi anyqtaldy. «Azat» jalpyulttyq sotsıal-demokratııalyq partııasynyń ókili Petr Svoık myrza osy semınar barysynda Ortalyq aılaý komıssııasynyń ustanǵan baǵytyn túsinbeı otyrǵandyǵyn jetkizdi. Osy sebepti ol keńesshi daýys berý quqy bar saıası partııa ókilderiniń qyzmetine qatysty tıisti keńes berýshi hat daıyndaýdy usyndy»,-dedi komıssııa tóraǵasynyń orynbasary.

Onyń sózine qaraǵanda, atalmysh hat elimizdiń aımaǵyndaǵy barlyq saılaý komıssııalaryna taratylýy kerek. Sonymen qatar hattyń kóshirmesi saıası partııalarǵa da joldanǵany lázim. «Bul hatta biz saıası partııalarǵa ózderiniń keńesshi daýys berý quqy bar ókilderin saılaý komıssııalaryna usyný tártibi men osy ókilderdiń mártebesi týraly jan-jaqty túsinikteme berdik»,-dedi V.Foos.