OSK: respýblıka boıynsha 87 adam senatorlyqtan úmitker
ASTANA. 7 shilde. QazAqparat /Jasulan Amanbaıuly/ - 19 tamyz kúni ótetin QR Parlamenti Senatynyń depýtattaryn saılaýǵa barlyǵy 87 adam óz kandıdatýrasyn usynyp otyr. Bul týraly búgin Astanada ótken baspasóz máslıhatynda Ortalyq saılaý komıssııasynyń tóraǵasy Qýandyq Turǵanqulov málim etti.
Olardyń ishinde eń kóp usynylǵan kandıdattar sany Jambyl oblysynda tirkelgen. Atalmysh oblystan 9 adam usynylyp otyr. Alaıda qazirgi ýaqytta ol úmitkerlerdiń úsheýi ǵana OSK tirkeýinen ótti.
Tóraǵanyń atap ótkenindeı, 15 adamdy máslıhattar usynǵan, taǵy 72 adam ózin-ózi usyný quqyǵyn paıdalanǵan.
Baspasóz máslıhatynda belgili bolǵanyndaı, Senat depýtattarynyń saılaýyna 4 áıel azamat kandıdatýralaryn usynǵan. 86 úmitkerdiń 9-y - Qazaqstan Respýblıkasy Parlamenti Senatynyń qazirgi depýtattary bolyp tabylady.
Sonymen qatar usynylǵan kandıdattardyń 42-si - «Nur Otan» partııasynyń músheleri. «Aq jol», «Aýyl», «Rýhanııat» partııalary men Qazaqstannyń patrıottar partııasynan bir-bir kandıdattan usynylǵan. 17 adam ózderiniń partııaǵa qatystylyǵyn kórsetpegen. 24 úmitker bolsa, elimizdiń eshbir partııasynda joq. Qazirgi sátte Senat depýtattyǵyna 54 kandıdat tirkeldi.
«OSK-nyń kúntizbelik josparyna sáıkes, kandıdattardy usyný 19 shildege deıin júredi», - dep atap kórsetti Q. Turǵanqulov.
