OSK: Prezıdenttikten úmitker Ǵanı Qasymov memlekettik tilden emtıhandy sátti tapsyrdy
ASTANA. 20 aqpan. QazAqparat /Aıdar Ospanalıev/ - 3 sáýir kúni ótetin kezekten tys Prezıdenttik saılaýǵa qatysý úshin Ortalyq saılaý komıssııasyna qujattaryn tapsyrǵan Parlament Senatynyń depýtaty Ǵanı Qasymov memlekettik tilden emtıhandy sátti tapsyrdy.
Búgin úmitker Ǵanı Qasymovtan emtıhan alǵan Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııa ókilderi osyndaı sheshimge keldi.
Lıngvıstıkalyq komıssııa tóraǵasy Myrzataı Joldasbekovtyń aıtýynsha, Ǵ.Qasymov emtıhannyń birinshi talaby boıynsha «Keń baıtaq jerim bar» atty taqyrypta shyǵarma jazdy. «Eki bet jazba jumysynda birqatar kemshilikter boldy. Atap aıtqanda, emle qatesi -3, tynys belgilerinen ketken qate - 5, stıldik qate - 2. Barlyǵy 10 qate. Biraq úmitkerdiń sóılem quraýy qarapaıym. Oıyn anyq jetkizgen jáne taqyrypty ashqan. Ekinshi talap boıynsha ol Qasym Amanjolovtyń óleńderin oqydy. Jalpy jaman emes. Degenmen keıbir dybystardy shatastyratyny baıqaldy. Al úshinshi talap boıynsha «Eńbek pen talap» taqyrybynda sóıledi. Úmitkerdiń sózderi qarapaıym. Degenmen ádebı tildiń ólshemin únemi saqtaı bermeıtindigi baıqaldy. Biraq eńbektiń, talaptyń ne ekenin ashyp, jaqsy áńgimelep berdi. Osylardyń barlyǵyn eskere kele, úmitker Ǵ.Qasymov memlekettik tildi meńgergen degen sheshimge keldik»,- dedi M.Joldasbekov.
