OSK Prezıdenttikten úmitker Amantaı qajy Asylbekti kandıdat etip tirkeýden bas tartqaly otyr
ASTANA. 20 aqpan. QazAqparat /Aıdar Ospanalıev/ - 3 sáýirde ótetin kezekten tys Prezıdenttik saılaýǵa qatysý úshin ótinish bergen «Attan, Qazaqstan» qozǵalysynyń jetekshisi Amantaı qajy Asylbek búgin kelip, memlekettik tilden emtıhan tapsyrmasa,
kelesi aptada Ortalyq saılaý komıssııasy ony kezekten tys Prezıdent saılaýyna kandıdat etip tirkeýden bas tartý týraly qaýly qabyldaıdy. Bul týraly búgin Ortalyq saılaý komıssııasynyń kezekti otyrysynda komıssııa tóraǵasy Qýandyq Turǵanqulov málim etti.
«Kezekten tys Prezıdent saılaýynan úmitker Amantaı qajy Asylbek búgin emtıhan tapsyrýy kerek. Alaıda onyń emtıhan tapsyrý úshin Almatydan kele jatqandyǵy jóninde eshqandaı málimet joq. Sondyqtan atalmysh azamat búgin memlekettik tilden emtıhan tapsyrmasa, kelesi aptada biz ony kezekten tys Prezıdenttik saılaýǵa kandıdat etip tirkeýden bas tartý týraly qaýly qabyldaımyz»,-dedi OSK tóraǵasy.
Esterińizge sala keteıik, kezekten tys Prezıdenttik saılaýǵa úmitker Amantaı qajy Asylbek aldyn ala belgilenip, eskertilgenine qaramastan Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń otyrysyna eki ret kelmeı qaldy.
