OSK Prezıdenttikke úmitker Meıramkúl Qojaǵulovany kandıdat retinde tirkeýden bas tartý týraly qaýly qabyldady

Komıssııanyń búgingi otyrysynda atalmysh máselege baılanysty baıandama jasaǵan OSK-nyń hatshysy Baqyt Meldeshovtyń aıtýynsha, M.Qojaǵulova Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııaǵa kelmeı qalǵan. «Osy sebepti atalmysh úmitker Konstıtýtsııa men «QR Saılaý týraly» konstıtýtsııalyq zańynyń memlekettik tildi erkin meńgergendigin meńgerý bóligindegi talaptaryna sáıkes emes dep tabyldy. Jalpy bul azamatshaǵa biz arnaıy lıngvıstıkalyq komıssııaǵa emtıhan tapsyrý qajettigi jóninde resmı hat jiberdik. Alaıda úmitker belgilengen merzimde emtıhan tapsyrýǵa kelmedi. Onyń aýmaqtyq saılaý komıssııalarymen de baılanyspaǵandyǵy anyqtaldy. Osy sebepti biz búgin M.Qojaǵulovany kandıdat retinde tirkeýden bas tartý týraly qaýly qabyldaýǵa májbúr bolyp otyrmyz», - dedi komıssııa hatshysy.