OSK Prezıdenttikke úmitker 4 birdeı azamatty kandıdat retinde tirkeýden bas tartqan qaýly qabyldady
ANA. 3 naýryz. QazAqparat /Aıdar Ospanalıev/ - Búgin Ortalyq saılaý komıssııasy 3 sáýirge belgilengen kezekten tys Prezıdenttik caılaýǵa kandıdat bolyp tirkelý maqsatynda qol jınaýmen aınalysyp júrgen 4 birdeı azamatty,
atap aıtqanda zańger Sálim Ótendi, ýaqytsha jumyssyz Gúldana Toqbaevany, kásipker Serik Saparǵalıdy jáne Jemqorlyqpen kúres qoǵamdyq komıtetiniń tóraǵasy Jaqsybaı Bázilbaevty kandıdat retinde tirkeýden bas tartyp, qaýly qabyldady.
OSK otyrysynyń barysyn EQYU Demokratııalyq ınstıtýttar jáne adam quqyqtary bıýrosynyń uzaq merzimdi mıssııasynyń ókili - saılaý jónindegi maman Alekseı Gromov baqylady.
Ortalyq saılaý komıssııasynyń otyrysynda kandıdat retinde tirkeýden bas tartylǵan 4 azamatqa qatysty baıandama jasaǵan OSK hatshysy Baqyt Meldeshovtyń sózine qaraǵanda, Prezıdenttikke kandıdatqa qoıylatyn talaptar boıynsha saılaýǵa túsýge nıet bildirgen adamnyń ótinishi bolýy kerek. Sonymen qatar úmitkerdiń aýmaqtyq saılaý komıssııalary tekserip rastaǵan qoldary jáne kandıdat týraly ómirbaıandyq derekter men úmitkerdiń jáne onyń jubaıynyń tabysy men múlki týraly deklaratsııanyń tapsyrylǵandyǵy jóninde salyq organynyń anyqtamasy bolýy qajet. Buǵan qosa úmitkerdiń saılaý jarnasyn engizgendigin kýálandyratyn qujat qajet.
«Al OSK Prezıdenttikke kandıdat retinde tirkeýden bas tartqan birinshi azamat Sálim Óten óziniń tabysy men múlkine qatysty deklaratsııany - salyq organynyń anyqtamasyn tapsyrmaǵan. Sondaı-aq onyń saılaý jarnasyn tólegendigin rastaıtyn kýáligi de joq. Buǵan qosa atalmysh úmitkerdiń qol jınaý paraqtary da talapqa saı emes. Al OSK Prezıdenttikke kandıdat etýden bas tartqan Gúldana Toqbaeva óziniń tabysy men múlkine qatysty deklaratsııany OSK-ǵa tapsyrmaǵan jáne saılaý jarnasyn da tólemegen. Qol jınaý paraqtary da talapqa saı emes. Atalǵan úmitker tipti Prezıdenttikke kandıdattardy tirkeý merziminiń búgin aıaqtalatynyn bilmeıtin de bolyp shyqty», - dedi B.Meldeshov.
Onyń sózinshe, OSK kandıdat etýden bas tartqan úshinshi azamat Jaqsybaı Bázilbaev jubaıy men óziniń tabysy jónindegi salyq deklaratsııasyn ótkizbegen. Buǵan qosa J.Bázilbaev ta saılaý jarnasyn tólegendigin kýálandyratyn qujatty bermegen jáne qol jınaý jumystaryn da júrgizbegen. Kandıdat etip tirkeýden bas tartylǵan tórtinshi azamat Serik Saparǵalı da óziniń jáne jubaıynyń tabysy men múliktik deklaratsııasy jónindegi qujattardy ótkizbegen.
Osylaısha 3 sáýirge belgilengen kezekten tys Prezıdent saılaýynda Ortalyq saılaý komıssııasy osy ýaqytqa deıin Prezıdenttikke kandıdat retinde tirkegen 4 azamat Memleket basshysy laýazymyna talasatyn bolady. Olar - «Nur Otan» halyqtyq demokratııalyq partııasy usynǵan qazirgi Memleket basshysy Nursultan Nazarbaev pen Qazaqstannyń kommýnıstik halyqtyq partııasynyń hatshysy Jambyl Ahmetbekov jáne Qazaqstannyń Patrıottar partııasy usynǵan Ǵanı Qasymov pen «Tabıǵat» ekologııalyq odaǵynyń tóraǵasy Mels Eleýsizov. Búginnen bastap Prezıdenttikke kandıdattar ózderiniń saılaýaldy úgit-nasıhat jumystaryn bastaıdy.
