OSK Prezıdenttikke kandıdattarǵa bıýdjetten bólinetin shyǵystardyń normatıvin belgileý týraly qaýly qabyldady
ANA. 26 aqpan. QazAqparat /Aıdar Ospanalıev/ - Búgin Ortalyq saılaý komıssııasy Prezıdenttikke kandıdattarǵa respýblıkalyq bıýdjetten bólinetin shyǵystardyń normatıvterin belgileý týraly qaýly qabyldady.
Saılaý zańnamasyna sáıkes, memleket kandıdattarǵa óz baǵdarlamalarymen buqaralyq aqparat quraldarynda tıisti úgit-nasıhat materıaldaryn jarııalaý úshin birdeı mólsherde qarajat bólinýine kepildik beredi. Atap aıtqanda, árbir kandıdattyń teledıdardan on bes mınýt sóz sóıleýine, 10 mınýt radıodan sóıeýine, sondaı-aq baspasóz betterinde 0,1 baspa tabaqtan aspaıtyn kólemde eki maqala jarııalaýyna qajetti qarajat bóledi.
Kandıdattarǵa saılaýaldy úgit júrgizýge bólinetin somalardy esepteý Baılanys jáne aqparat mınıstrligi usynǵan málimetter negizinde júrgizildi. Bul rette kandıdattardyń baǵdarlamalaryn teledıdar arqyly baıandaýyna 4 mıllıon 625 myń teńge, radıodan 10 mınýt sóıleýge árbir kandıdatqa 169 myń teńge bólinedi. Sondaı-aq baspasóz basylymdarynda 540 sharshy sm. kóleminde eki maqala jarııalaýǵa kandıdattardyń árqaısysyna 810 myń teńge bólinbek.
Budan bólek kandıdattarǵa saılaýshylarmen kezdesýler ótkizý úshin úı-jaılar jaldaý maqsatynda 200 myń teńge, baspa -úgit materıaldaryn basyp shyǵarýǵa 290 myń teńge beriledi. Al árbir kandıdattyń kólik shyǵyndary úshin taǵy 200 myń teńge qarastyrylǵan.
