OSK partııalyq tizim boıynsha saılanatyn kandıdattardy tirkeý qorytyndysyn shyǵardy

ASTANA. QazAqparat – Ortalyq saılaý komıssııasy partııalyq tizimder boıynsha Májilis depýtattyǵyna kandıdattardy tirkeý nátıjesin jarııalady, dep habarlaıdy QazAqparat tilshisi.

«Búgin jergilikti ýaqyt boıynsha saǵat 18:00-de tirkeý kezeńi aıaqtalady. Sonymen qatar, 15 aqpanda Parlament Májilisine saılaý boıynsha usynylǵan barlyq 7 saıası partııanyń partııalyq tizimderi boıynsha tirkeý aıaqtaldy. Aýmaqtyq saılaý komıssııalarynyń aqparatyna saı, keshe proportsıonaldy negizde saılanatyn oblystar men respýblıkalyq mańyzy bar qalalar men Astana máslıhaty depýtattarynyń jartysyn saılaý jónindegi partııalyq tizimderdi tirkeý óz máresine jetti. Kandıdattardy bir mandatty okrýgter boıynsha tirkeý 20 óńirdiń árqaısysynda jergilikti ýaqyt boıynsha 18:00-ge deıin jalǵasatyn bolady», - dedi QR OSK tóraǵasynyń orynbasary Konstantın Petrov.

Sonymen qosa ol partııalyq tizim negizinde 69 depýtat saılanatynyn atap ótti.

«Barlyq 7 partııanyń sezderinde partııalyq tizimge 283 kandıdat engizildi. Tirkeý kezeńinde ár saıası partııanyń ókilderi qaraldy. Biz barlyq 7 partııanyń tizimin tolyq zerdeledik», - dedi Konstantın Petrov.

Onyń aıtýynsha, Qazaqstan halyq partııasynan – 52, «Aq jol» demokratııalyq partııasynan – 54, Jalpyulttyq sotsıal-demokratııalyq partııasynan - 19, «Baıtaq» jasyldar partııasynan – 18, «Aýyl» halyqtyq-demokratııalyq partııasynan – 25, «Amanat» partııasynan – 90, «Respublica» partııasynan – 23 kandıdat tirkeldi. Sonymen qatar, sońǵysynan 2 kandıdat ózderi bergen ótinishke sáıkes, partııalyq tizimnen shyǵaryldy.

«Osylaısha, QR Parlamenti Májilisi depýtattarynyń 69 mandatyna úmitker saıası 7 partııanyń tizimine 281 kandıdat engizildi. Árbir saıası partııa áıelderdiń, jastardyń jáne múgedektigi bar adamdardyń qajetti kólemin saqtaıdy. Osy úsh sanatqa jatatyn kandıdattardyń barlyq partııalyq tizimderde usynylý mólsheri - 38,1%. Úmitkerlerdiń ortasha jasy - 45,7. 19 úmitker 29 jasqa deıingi jastar bolsa, 80 áıel kandıdat usynyldy. Bul jalpy sannyń 28,5%-yn quraıdy. Sonymen qosa, 201 er adam usynyldy. Tizimge 12 ulttyń ókilderi engizilgen», - dep túıindedi Konstantın Petrov.

Eske sala keteıik, Májilis pen maslıhat depýtattaryn kezekten tys saılaý 19 naýryzǵa belgilengen.