OSK Parlament Májilisiniń saılaýy jóninde alǵashqy otyrysyn ótkizdi

ASTANA. QazAqparat - QR OSK Parlament Májilisiniń saılaýy jóninde alǵashqy otyrysyn ótkizdi. Ortalyq saılaý komıssııasynyń otyrysynda Elbasy Jarlyǵyna sáıkes QR Parlament Májilisiniń kezekti saılaýy 20 naýryzda ótetini atap kórsetilip, tıisti qaýly qabyldandy.

Atalmysh merzim Qazaqstan Respýblıkasynyń «Saılaý týraly» zańyna sáıkes belgilenip otyr.

Sonymen qatar, Ortsaılaýkom otyrysynda Memleket basshysynyń Jarlyǵymen taǵaıyndalǵan partııalyq tizimder boıynsha saılanatyn Parlament Májilisi depýtattaryn saılaýdyń jáne Qazaqstan halqy Assambleıasy saılaıtyn Parlament Májilisi depýtattaryn saılaýdyń kúntizbelik josparlary, sondaı-aq atalǵan saılaý naýqandaryn uıymdastyrýǵa qajetti saılaý qujattarynyń úlgileri bekitildi.