OSK músheleri halyqaralyq baıqaýshylarmen saılaý sharalaryn talqylady
ASTANA. 1 naýryz. QazAqparat /Aıdar Ospanalıev/ - Búgin QR Ortalyq saılaý komıssııasynyń tóraǵasy Qýandyq Turǵanqulov jáne osy komıssııanyń músheleri 3 sáýirge belgilengen kezekten tys Prezıdenttik saılaýdy baqylaý maqsatynda elimizge kelgen Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar jáne adam quqyqtary jónindegi bıýro mıssııasynyń negizgi tobymen kezdesti.
Ortalyq saılaý komıssııasynyń hatshysy Baqyt Meldeshovtyń aıtýynsha, júzdesý barysynda mıssııa ókilderi kóptegen máseleler boıynsha ózara pikir almasty. Ol negizinen saılaýdy baqylaý sharalaryna qatysty boldy. «Qonaqtar qazirgi tańda Prezıdenttikke kandıdattardyń qol jınaý máseleleri jóninde de birshama málimetter aldy. Jalpy biz olardy eldegi saılaýdyń barysymen tolyq tanystyryp shyqtyq. Bul rette, árıne, mıssııa ókilderiniń kóbine qol jınap jatqan úmitkerlermen tyǵyz qarym-qatynasta jumys istegenderi durys bolady»,-dedi komıssııa hatshysy.
Onyń sózine qaraǵanda, 3 naýryzdan bastap Prezıdenttikke kandıdat retinde tirkelgen azamattar úgit-nasıhat jumystaryna kirisedi. Osyǵan qaraı baıqaýshylar úshin de biraz jumys tabylady. «Mıssııa ókilderimen Ortalyq saılaý komıssııasynyń atqaryp jatqan jumystaryna baılanysty da pikir almasyldy. Olardy kóbine jergilikti saılaý komıssııalarynyń jumysy olardyń jergilikti jerde atqaryp jatqan sharalary qyzyqtyrdy. Biz olarǵa tyńǵylyqty jaýap berdik degen oıdamyn. Jaqynda mıssııa ókilderi elimizdiń aımaqtaryndaǵy saılaýǵa qatysty jaǵdaıdy baqylaýǵa barady. Olar ózderin tolǵandyrǵan jaýaptarǵa sol aımaqtarda da tolyqqandy jaýap alady degen oıdamyn»,- dedi B.Meldeshov.
