OSK músheleri elimizdiń 20 óńirindegi saılaýǵa daıyndyq barysyn tekserip shyǵady
«Qazir Ortalyq saılaý komıssııasy janynan sarapshylyq keńes jumysyn qaıtadan jańǵyrtyp jatyrmyz. Onyń alǵashqy otyrysy 10 qarasha kúni ótedi. Ondaǵy negizgi maqsatymyz – osy jyldyń maýsymm aıynda ótken respýblıkalyq referendýmda baıqaýshy bolǵan EQYU mıssııasy esebin talqylaý. Atalǵan esep jaqynda qolymyzǵa tıdi», - dedi Nurlan Ábdirov Ortalyq saılaý komıssııasy janyndaǵy Jas saılaýshylar klýbynyń otyrysynda.
Osy oraıda OSK tóraǵasy 20 qarashada ótetin kezekten tys prezıdent saılaýyna da EQYU mıssııasynan 30 baıqaýshy uzaq merzimge keletindigin aıtty. Olar saılaý ótkennen keıin de biraz ýaqyt elimizde bolmaq. Munan bólek, qysqa merzimdi taǵy 300 baıqaýshy respýblıkanyń barlyq óńirinde saılaý úderisiniń ótý barysyn jiti baqylaýda ustamaq.
«Sonymen qatar erteńnen bastap mende, Ortalyq saılaý komıssııanyń barlyq múshesi de 13 qarashaǵa deıin Qazaqstannyń búkil 20 óńirin aralap shyǵamyz. Alǵa qoıǵan maqsatymyz - istelip jatqan jumystardy kózimizben kórý, qatelikter, kemshilikter bolsa onda ony qoldan kelgenshe túzetý. Jańylyspasam, bizde 10 102 ýchaskelik saılaý komıssııasy bar. Jalpy, komıssııa ashylyp, jabylyp jatady. Óıtkeni, elimizde kóshi-qon úderisi bar. Bir óńirde saılaýshylar sany kemise ýchaskeni jabamyz, al artyp ketse ashamyz. Sebebi zańǵa sáıkes, bizde bir ýchaske 3 myń daýys berýshige arnalǵan. Odan aspaýy kerek», - dedi ol.
Nurlan Ábdirovtyń aıtýynsha, ýchaskelik saılaý komıssııalary músheleriniń 99 paıyzy nemese 10 myńnan astam adam basqa salada jumys isteıdi. Tek olar, saılaý naýqanyna ǵana tartylady. Olarǵa negizgi jumys ornyndaǵy jalaqy saqtalyp, saılaý úderisterine komıssııa múshesi retinde qatysqany úshin de aılyq tólenedi. Jalpy, kezekten tys prezıdent saılaýyn ótkizýge 20,5 mlrd teńge qarajat bólinip otyr. Biraq bul qarajattyń 80 paıyzy ýchaskelik saılaý komıssııalary músheleriniń jalaqysyna tólenbek.
