OSK Májilis depýtattary saılaýynyń qorytyndysyn 22 qańtardan keshiktirmeýi tıis
ASTANA. 14 qańtar. QazAqparat /Aıdar Ospanalıev/ - Erteń Qazaqstan halqy ózderi Parlament Májilisinen kórgisi keletin saıası partııalarǵa daýys beredi.
Daýys berý sharasy tańǵy saǵat 7.00-den keshki 20.00-ge deıin jalǵasady. Bul týraly búgin Ortalyq saılaý komıssııasy (OSK) tóraǵasynyń orynbasary Vladımır Foos sheteldik jýrnalısterge arnap ótkizgen brıfıngte málim etti.
Onyń aıtýynsha, daýys berý sharasy barysynda «Esepten shyǵarý» kýálikteri paıdalanylady. Kýálikterdi berý 15 qańtar kúni keshki saǵat 18.00-ge deıin jalǵasady. «Bul kýálikter jolda kele jatqan saılaýshylardyń kez-kelgen saılaý ýchaskesinen daýys berýine múmkindik jasaıdy. Daýys berý kúni barlyq baıqaýshylarǵa saılaý barysyn eshqandaı kedergisiz baǵalaýǵa jaǵdaı jasalady. Berilgen daýystardy sanaý sharasyn saılaý komıssııalarynyń ókilderi júzege asyrady», - dedi V.Foos.
Sondaı-aq onyń sózinshe, saılaý zańnamalaryna sáıkes, OSK aımaqtyq saılaý komıssııalarynyń hattamalary negizinde 22 qańtardan keshiktirmeı, Májilis depýtattary saılaýynyń qorytyndysyn shyǵaryp, tıisti qaýly qabyldaıdy. «Saıası partııalar tiziminiń negizinde saılanatyn Májilis depýtattary saılaýynyń qorytyndylary jónindegi málimetter bıylǵy jyldyń 25 qańtarynan keshiktirilmeı jarııalanýy tıis», - dedi OSK tóraǵasynyń orynbasary.
