OSK máslıhat depýtattarynyń aldaǵy saılaýyn talqylady

ASTANA. QazAqparat - Búgin B.Imashevtiń tóraǵalyǵymen Qazaqstan Respýblıkasy Ortalyq saılaý komıssııasynyń otyrysy ótti, dep habarlaıdy QazAqparat OSK baspasóz qyzmetine jasap.

Ortsaılaýkom músheleri máslıhattardyń shyǵyp qalǵan depýtattarynyń ornyna aldaǵy saılaý jónindegi máseleni qarastyrdy.

«Qazaqstan Respýblıkasyndaǵy saılaý týraly» Konstıtýtsııalyq zańnyń 101 jáne 113-baptaryna sáıkes shyǵyp qalǵan máslıhattar depýtattarynyń ornyna kezekten tys saılaý jylyna eki ret naýryzdyń jáne (nemese) qazannyń sońǵy jeksenbisinde ótkiziledi. Osyǵan oraı 2018 jylǵy 28 qazanda respýblıkanyń 14 óńirinde saılaý ótedi.

Respýblıka boıynsha tutas alǵanda 83 bos okrýg quryldy, sonyń ishinde: Oblystyq máslıhattarǵa - 12, qalalyq máslıhattarǵa - 9, aýdandyq máslıhattarǵa - 62.

2018 jylǵy qazandaǵy saılaý naýqanyna depýtattardyń ókilettigin merziminen buryn toqtatýdyń negizgi sebepteri: Tıisti ákimshilik-aýmaqtyq birliktiń shekarasynan tys turaqty turýǵa ketý - 31; memlekettik qyzmetke qabyldaý - 26; otstavka týraly jeke ótinishi - 16 (sonyń ishinde densaýlyǵyna baılanysty - 5); depýtattyń qaıtys bolýy - 5; oblystyq máslıhat depýtaty bolyp saılanýy - 3; Qazaqstan Respýblıkasynyń azamattyǵyn toqtatýy - 2.

Máslıhattar depýtattarynyń ókilettigi kelesi laýazymdarǵa saılaýyna nemese taǵaıyndalýyna baılanysty merziminen buryn toqtatyldy: Aýdan ákimi, aýdan ákiminiń orynbasary - 3 adam; oblystyq (aýdandyq) mańyzy bar qala ákimi, ákimniń orynbasary - 4 adam;  aýyldyq okrýg ákimi - 4 adam.

Oblystyq jáne aýdandyq dengeıdegi jergilikti atqarýshy organdardyń mamandary bolyp taǵy 14 máslıhat depýtaty taǵaıyndalyp, 3 aýdandyq máslıhat depýtaty oblystyq máslıhat depýtattary bolyp saılandy.

Kandıdattardy usyný 2018 jylǵy 28 tamyzda bastalyp, 27 qyrkúıekke deıin ótkiziledi. Kandıdattardy tirkeý 2018 jylǵy 2 qazanda aıaqtalady.

Otyrys barysynda sonymen birge Qazaqstan Respýblıkasy Ortalyq saılaý komıssııasynyń «2018 jylǵy  5  qazanǵa taǵaıyndalǵan Qazaqstan Respýblıkasy Parlamentiniń Senaty depýtattarynyń saılaýynda Qazaqstan Respýblıkasy Parlamenti Senatynyń depýtattyǵyna kandıdattyń respýblıkalyq bıýdjet qarajatynan jabylatyn shyǵystarynyń mólsherlerin belgileý týraly» qaýlysy qabyldandy.