OSK Quryltaı depýtattaryna kýálikteri men tósbelgilerin tabystady
ASTANA. KAZINFORM — Búgin, 2026 jylǵy 27 tamyzda Qazaqstan Respýblıkasy Ortalyq saılaý komıssııasynyń XVI otyrysy ótip, onda Qazaqstan Respýblıkasy Quryltaıynyń depýtattary tirkeldi. Іs-sharaǵa Quryltaıdyń saılanǵan barlyq depýtat qatysty.
Ortalyq saılaý komıssııasy tóraǵasy Nurlan Ábdirov «Qazaqstan Respýblıkasynyń Quryltaıy jáne onyń depýtattarynyń mártebesi týraly» Konstıtýtsııalyq zańnyń 44-babyna sáıkes Quryltaı depýtatynyń ókileti Qazaqstan Respýblıkasynyń Ortalyq saılaý komıssııasynda depýtat retinde tirkelgen sátten bastalatynyn aıtty.
Otyrysta baıandama jasaǵan OSK tóraǵasynyń orynbasary Muhtar Erman Ortalyq saılaý komıssııasy bes saıası partııadan saılanǵan Qazaqstan Respýblıkasy Quryltaıynyń 145 depýtattaryn tirkeýdi kózdeıtin qaýly jobalaryn ázirlegenin habarlady.
Osyǵan baılanysty «Ádilet» partııasynan — 110 depýtat, Jalpyulttyq sotsıal-demokratııalyq partııadan — 8, «Aýyl» partııasynan — 10, «Aq jol» Qazaqstannyń demokratııalyq partııasynan — 8 jáne «Respublica» partııasynan — 9 depýtat tirkeldi.
— Sizderdiń ókiletterińiz Ortalyq saılaý komıssııasynda tirkelgen sátten bastap bastaldy. Endi sizder — Qazaqstan Respýblıkasynyń zań shyǵarýshy bıligin júzege asyratyn joǵary ókildi organ — Qazaqstan Respýblıkasy Quryltaıynyń depýtattarysyzdar. Quryltaı depýtattary tikeleı saılaý quqyǵy negizinde saılandy. Saılaý naýqanynyń barlyq kezeńderi zańnama talaptaryna qatań sáıkes uıymdastyryldy. Depýtattyq mandat — halyqtyń senimi men tańdaýynyń nátıjesi, al Quryltaı depýtatynyń mártebesi árqaısyńyzǵa elimiz men halqymyzdyń aldynda úlken jaýapkershilik júkteıdi, — dep atap ótti Nurlan Ábdirov.
Іs-shara sońynda Ortalyq saılaý komıssııasynyń Tóraǵasy Quryltaı depýtattaryna kýálikteri men tósbelgilerin tabystady.
Eske salaıyq, buǵan deıin partııalar Quryltaı depýtattarynyń tizimin jarııalaǵan edi. «Ádilet» partııasy 110, «Aýyl» partııasy 10, Respublica – toǵyz, al JSDP men «Aq jol» partııalary segiz depýtattan turatyn tizimdi usyndy.
