OSK QR Prezıdenttigine kandıdattyń memlekettik tildi erkin meńgergendigin anyqtaıtyn lıngvıstıkalyq komıssııanyń jańa quramyn bekitti
ANA. 7 aqpan. QazAqparat /Aıdar Ospanalıev/ - Búgin Ortalyq saılaý komıssııasy 2005 jylǵy 31 tamyzda qabyldanǵan «QR Prezıdenttigine kandıdattyń memlekettik tildi erkin meńgergendigin anyqtaý jóninde lıngvıstıkalyq komıssııa qurý týraly» qaýlysyna ózgerister engizip, onyń jańa quramyn bekitti.
Bul týraly búgin Ortalyq saılaý komıssııasynyń otyrysynda atalmysh komıssııa tóraǵasy Qýandyq Turǵanqulov málim etti.
Onyń sózine qaraǵanda, QR Prezıdenttigine kandıdattyń memlekettik tildi erkin meńgergendigin anyqtaý rásiminiń ózi ózgergen joq. Ol Ortalyq saılaý komıssııasynyń 2005 jylǵy 31 tamyzynda qabyldanǵan «QR-nyń Prezıdenttigine kandıdattyń memlekettik tildi erkin meńgergendigin anyqtaý rásimi týraly» qaýlysymen aıqyndalǵan. Oǵan sáıkes azamattardyń memlekettik tildi erkin meńgergendigin anyqtaý úshin lıngvıstıkalyq komıssııa usynǵan taqyryp boıynsha kólemi 2 betten aspaıtyn jazbasha tapsyrma jazý kerek. Sonymen qatar lıngvıstıkalyq komıssııa usynǵan kólemi 3 baspa betten aspaıtyn mátindi oqýy qajet. Buǵan qosa kópshilik aldynda 15 mınýttan kem emes, sóz sóıleý talap etiledi. Lıngvıstıkalyq komıssııanyń otyrysyna osy komıssııanyń músheleri men Prezıdenttikke kandıdattan basqa Ortalyq saılaý komıssııasynyń múshesi baıqaýshy retinde qatysýǵa quqyly.
Lıngvıstıkalyq komıssııanyń sheshimi komısssııa músheleri sanynyń kópshilik daýysymen ashyq daýys berý arqyly qabyldanady jáne otyrys hattamasymen rásimdeledi. Lıngvıstıkalyq komıssııanyń sheshimi birden otyrysqa qatysqan Ortalyq saılaý komıssııasynyń múshesine beriledi. Usynylǵan kandıdattardyń Konstıtýtsııa men «QR-yndaǵy saılaý týraly» Konstıtýtsııalyq zańda qoıylǵan talaptarǵa sáıkestigi anyqtalǵannan keıin 5 kúnniń ishinde Ortalyq saılaý komıssııasy kandıdattarǵa azamattardyń qoldaryn jınaý úshin qol qoıý paraqtaryn berýge mindetti.
