OSK QR Prezıdentiniń kezekten tys saılaýyna qatysty BAQ-tardaǵy materıaldarǵa monıtorıng júrgizýde

Bul týraly búgin kezekti otyrys barysynda Ortalyq saılaý komıssııasynyń tóraǵasy Qýandyq Turǵanqulov málim etti.

Onyń sózine qaraǵanda monıtorıng jumystary 53 basylym men 11 respýblıkalyq televızııalyq arnalardy qamtıdy. «Buǵan qosa biz 6 aqparat agenttigi men 11 qoǵamdyq-saıası baǵyttaǵy ınternet-resýrstardyń materıaldaryn qadaǵalap otyrmyz. Monıtorıng jumystarynyń nátıjelerine sáıkes, 3-10 naýryz aralyǵynda baspasóz basylymdarynda kezekten tys Prezıdent saılaýyna arnalǵan 223 materıal jarııalandy. Al elektrondy aqparat quraldarynda 403 materıal efırge shyqty, 166 materıal qoǵamdyq-saıası ınternet resýrstarynda jaryq kórdi», - dedi Q.Turǵanqulov.

Sondaı-aq ol sózinde Prezıdenttikke kandıdat, Elbasy Nursultan Nazarbaevtyń úgit-nasıhat jumystaryna qatysýdan bas tartýyna baılanysty Prezıdenttiń úgit jumystarymen onyń senimdi adamdary men saılaýaldy shtabynyń ókilderi aınalysyp jatqandyǵyn atap kórsetti. «Prezıdenttikke kandıdattardyń 3-ýi ózderin buqaralyq aqparat quraldary arqyly nasıhattaý jumystaryna saılaý qorlarynyń qarjysyn paıdalanǵan joq. Al televıdenıedegi nasıhat jumystaryn barlyq kandıdattar júzege asyrdy», - dedi OSK tóraǵasy.

Onyń sózinshe, Prezıdenttikke kandıdattar týraly sıýjetter men olardyń saılaýaldy shtabtary jónindegi televıdenıe arqyly taratylǵan qorytyndy jańalyqtardan buqaralyq aqparat quraldarynyń saılaý zańnamalaryn talapqa saı oryndap otyrǵandyǵyn kórýge bolady. «3-10 naýryz aralyǵynda televıdenıe arqyly efırge Prezıdenttikke kandıdat Nursultan Nazarbaev týraly 44 sıýjet, Jambyl Ahmetbekov týraly 47 sıýjet, Mels Eleýsizov týraly 50 sıýjet jáne Ǵanı Qasymov týraly 51 sıýjet shyqqan. «Saılaý týraly» zańyna sáıkes televıdenıeden 15 mınýt, radıodan 10 mınýt sóıleýge jáne baspasóz basylymdarynyń betinde maqala jarııalaýǵa bólingen qarjyny áli birde-bir kandıdat paıdalanǵan joq», - dedi Q.Turǵanqulov.