OSK kezekten tys Prezıdent saılaýyn baqylaýǵa kelgen taǵy 328 baıqaýshyny tirkedi
ASTANA. 24 naýryz. QazAqparat /Aıdar Ospanalıev/ -Ortalyq saılaý komıssııasy búgin Syrtqy ister mınıstrliginiń usynýymen 3 sáýirge taǵaıyndalǵan kezekten tys Prezıdent saılaýyna qatysý maqsatynda elimizge kelgen halyqaralyq uıymdar men shet memleketterdiń taǵy 328 baıqaýshysyn tirkedi.
Bul týraly búgin Ortalyq saılaý komıssııasynyń kezekti otyrysynda málim boldy.
OSK-nyń múshesi Tatıana Ohlapkovanyń málimetterinshe, osymen kezekten tys Prezıdent saılaýyn baqylaý úshin elimizde tirkelgen baıqaýshylardyń jalpy sany 868-ge jetti. Olardyń arasynda Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar men adam quqyqtary jónindegi bıýrosynyń mıssııasynan - 335, Táýelsiz memleketter dostastyǵy uıymynyń mıssııasynan -375, Shanhaı yntymaqtastyq uıymy mıssııasynan -12, halyqaralyq 4 uıymnan -22, shet memleketterden -124 baıqaýshy tirkelgen.
