Quryltaı saılaýy: «Qazaqstan Halyq partııasy» tizimi tirkeldi
ASTANA. KAZINFORM — Ortalyq saılaý komıssııasy Quryltaı depýtattaryn saılaýǵa qatysatyn «Qazaqstan halyq partııasynyń» partııalyq tizimin tirkedi. Tizimge 72 kandıdat engizilgen.
OSK otyrysynda komıssııa múshesi Ásel Janabilovanyń aıtýynsha, partııa usynǵan qujattar Qazaqstan Konstıtýtsııasy men «Qazaqstan Respýblıkasyndaǵy saılaý týraly» Konstıtýtsııalyq zań talaptaryna sáıkestigi turǵysynan tekserilgen.
— Partııalyq tizimge engizilgen barlyq kandıdat Konstıtýtsııa men «Qazaqstan Respýblıkasyndaǵy saılaý týraly» Konstıtýtsııalyq zań talaptaryna sáıkes keledi, — dedi Ásel Janabilova.
Onyń sózinshe, kandıdattardyń barlyǵy zańda belgilengen talaptarǵa saı. Atap aıtqanda, olardyń Qazaqstan azamattyǵy bar, el aýmaǵynda keminde 10 jyl turaqty turǵan jáne 25 jasqa tolǵan. Sondaı-aq partııalyq tizimde zańda kózdelgen kvota saqtalǵan.
Budan bólek, «Qazaqstan halyq partııasy» ótken saılaýda saılaýshylardyń 5 paıyzdan astamynyń daýysyn alǵandyqtan, saılaý jarnasyn tóleýden bosatyldy.
Buǵan deıin Ortalyq saılaý komıssııasy Quryltaı depýtattaryn saılaýǵa qatysatyn «Aq jol» Qazaqstan demokratııalyq partııasynyń partııalyq tizimin tirkedi.
