OSK Qanat Esjanovty QR Prezıdenttigine kandıdat retinde tirkeýden bas tartyp, tıisti qaýly qabyldady

Aıta keteıik, Prezıdenttik saılaýǵa qatysýǵa úmitker retinde OSK-ǵa ótinish bergen Astana qalasynyń turǵyny, ýaqytsha jumyssyz azamat Qanat Esjanov keshe Prezıdentikke kandıdattardyń memlekettik tildi meńgergendigin anyqtaıtyn lıngvıstıkalyq komıssııanyń synyna ótpeı qalǵan bolatyn.

OSK-nyń búgingi otyrysynda osy máselege baılanysty baıandama jasaǵan Ortalyq saılaý komıssııasynyń hatshysy Baqyt Meldeshovtyń aıtýynsha, Q.Esjanovtyń Prezıdenttik saılaýǵa qatysý úshin OSK-ǵa ótkizgen ótinishi men qujattary Konstıtýtsııa men «QR Saılaý týraly» konstıtýtsııalyq zań talaptaryna sáıkestigin tekserý úshin quzyrly organǵa jiberilgen. «Qazirgi tańda qajetti materıaldardyń barlyǵy tekserilip bitti jáne saılaýǵa qatysýshy úmitkerdiń barlyq zań talaptaryna sáıkestigi anyqtaldy. Alaıda úmitker Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń synynan ótpeı qaldy. Sondyqtan Q.Esjanovty Prezıdenttikke úmitker retinde Konstıtýtsııa men «Qazaqstan Respýblıkasyndaǵy saılaý týraly» Konstıtýtsııalyq zań qoıatyn talaptarǵa saı emes dep taýyp, ony Prezıdenttikke kandıdat retinde tirkeýden bas tartý týraly qaýly qabyldaýdy usynamyn»,- dedi komıssııa hatshysy.

Al otyrys barysynda Q.Esjanovtyń emtıhan jumysynyń nátıjelerimen tanystyrǵan Prezıdenttikke kandıdattardyń memlekettik tildi meńgergendigin anyqtaý jónindegi lıngvıstıkalyq komıssııa múshesi Sherýbaı Qurmanbaıulynyń sózinshe, Q.Esjanov ózge kandıdattar sııaqty emtıhandy 3 deńgeı boıynsha tapsyrdy. «Ol aldymen «Táýelsizdik belesteri» degen taqyrypqa shyǵarma jazyp, qosymsha ýaqyt surady. Biz belgilengen tártip boıynsha taǵy 30 mınýt qosyp berdik. Osylaısha 1 saǵat 30 mınýtta úmitker 2 betten asatyn shyǵarma jazdy. Shyǵarmada stıldik, emlelik jáne tynys belgileri boıynsha qateler óte kóp boldy. Jalpy qataler sany - 36. Jazý barysynda aýyzeki sóıleý tiliniń elementterin kóp qoldandy. ıAǵnı jazbasha stıl qalyptaspaǵan. Ekinshi aýyzsha mátindi oqý tapsyrmasynan Abaıdyń qara sózderi taqyrybyn tańdady. Biraq ol Abaıdyń qara sózderin ejelep, qatty qınalyp oqydy. Ondaǵy kóne sózderdi durys aıta almady. Onyń ústine óziniń oqyǵan taqyrybynyń maǵynasyn da túsinbedi. Úshinshi synaq boıynsha oǵan «Qazaqstan sporty belesten, beleske» degen taqyrypty tústi. Alaıda ol bul taqyryp týraly málimetteriniń tarlyǵyn aıtyp, basqa taqyryp surady. Biraq zań boıynsha biz ondaı jeńildik jasaı almaıtynymyzdy aıtyp, osy taqyrypqa daıyndalýǵa ýaqyt berdik. Úmitker sport taqyryby boıynsha 15 mınýttyń ornyna 6 mınýt qana sóılep, óziniń oıyn erkin jetkize almady. Onyń ústine orys tilindegi sózderdi aralastyryp sóıledi. Osylardyń bárin eskere kele lıngvıstıkalyq komıssııa Q.Esjanov memlekettik tildi erkin meńgermegen degen qorytyndyǵa keldi», - dedi komıssııa múshesi.

OSK tóraǵasy Qýandyq Turǵanqulovtyń sózine qaraǵanda, búgingi otyrysqa emtıhan tapsyra almaǵan úmitkerdiń ózi de shaqyrylǵan. Alaıda ol otyrysqa kelmeı qalǵan.