OSK hatshysy úmitkerlerge BAQ-qa óz baǵdarlamalarymen shyǵý tártibin túsindirdi
Otyrysta QR Parlamenti Senatynyń depýtattyǵyna kandıdattyń respýblıkalyq bıýdjet qarajatynan óteletin shyǵystarynyń mólsherin belgileý jáne QR Parlamenti Senatynyń depýtattyǵyna kandıdattardyń saılaý qorlary týraly másele qaraldy. Sábıla Mustafınanyń aıtýynsha, zańǵa sáıkes memleket Senat depýtattyǵyna saılanatyn kandıdattarǵa óz baǵdarlamalarymen BAQ-qa shyǵý úshin qarajat teń bólinýine kepildik beredi.
«BAQ-qa shyǵý úshin kandıdattarǵa qarajat bólý tártibi men kólemin Ortalyq saılaý komıssııasy aıqyndaıdy. OSK-nyń kandıdattarǵa BAQ quraldaryna shyǵý úshin qarajat bólý qaǵıdalary boıynsha tıisti qaýlyǵa sáıkes kandıdattarǵa óz baǵdarlamalarymen BAQ-qa shyǵý tártibi mynadaı: teledıdardan 15 mınýt, radıodan 10 mınýt, merzimdi baspasóz basylymdarynda nemese jelilik basylymdarda 0,1 baspa tabaqtan artyq emes», - dedi ol.
Sonymen qatar Sábıla Mustafına kandıdattar ózderiniń saılaý aldyndaǵy baǵdarlamalarymen sóz sóıleý úshin memleket bólgen qarajat sheńberinde baspa nemese jelilik basylymdardaǵy, tele-radıoarnalardaǵy jarııalanymdar kólemin ózderi bóletinin jetkizdi.
«Sondaı-aq respýblıkalyq bıýdjet qarajatynan kandıdattardyń saılaý aldyndaǵy jarııaly is-sharalaryn ótkizýge, úgit materıaldaryn shyǵarýǵa arnalǵan shyǵystary men kólik shyǵystary Ortalyq saılaý komıssııasy belgilegen mólsherde óteledi», - deıdi OSK hatshysy.
Osylaısha joǵaryda baıandalǵannyń negizinde OSK óz qaýlysymen QR Parlamenti Senatynyń depýtattyǵyna kandıdattyń respýblıkalyq bıýdjet qarajatynan óteletin shyǵystaryn 450 000 teńge kóleminde belgiledi:
1) teledıdardan, radıodan baǵdarlamamen sóz sóıleý jáne merzimdi baspa basylymdarynda 2 maqala jarııalaý úshin - 300 000 teńge;
2) saılaý aldyndaǵy kópshilik is-sharalardy ótkizý jáne úgit materıaldaryn shyǵarý úshin - 70 000 teńge;
3) kólik shyǵyndary úshin - 80 000 teńge.
Aıta keteıik, osy jyldyń 12 maýsymynda Memleket basshysy Qasym-Jomart Toqaevtyń QR Parlamenti Senaty depýtattarynyń saılaýyn 2020 jylǵy 12 tamyzǵa taǵaıyndaý týraly qaýlysy shyqqan edi.
Osyǵan oraı QR Ortalyq saılaý komıssııasynyń onlaın rejımde otyrysy ótip, onda saılaýǵa qatysty kúntizbelik is-sharlar jospary bekitilgen. 13 maýsymnan bastap Senat depýtattyǵyna kandıdattardy usyný bastaldy. Sondaı-aq úmitkerlerge qoıylatyn talaptar jarııa etildi.