OSK Ǵ. Qasymov pen M. Eleýsizovty QR Prezıdenttigine kandıdat retinde tirkedi

Bul azamattar «QR Saılaý týraly» konstıtýtsııalyq zańynyń 59- babynyń 5-tarmaqshasyna sáıkes, Ortalyq saılaý komıssııasyna barlyq qajetti qujattardy ótkizgen. «QR Saılaý týraly» konstıtýtsııalyq zańynyń 56-babynyń 2- tarmaǵyna sáıkes, Prezıdenttikke kandıdat respýblıkadaǵy oblystardyń jáne Astana men Almaty qalalarynyń kem degende úshten ekisiniń atynan teńdeı ókildik etetin saılaýshylardyń jalpy sanynyń kem degende 1 paıyzy qoldaýy tıis. Mels Eleýsizovtyń kandıdatýrasyn qoldap, elimizdiń 15 óńirinen teńdeı ókildik etetin 97 myń 830 saılaýshynyń qoly jınalǵan. Bul belsendi saılaý quqyǵyna ıe saılaýshylardyń 1 paıyzynan astamy. Al Ǵ.Qasymovtyń kandıdatýrasyn qoldap elimizdiń 15 óńirinen teńdeı ókildik etetin 99 myń 728 saılaýshynyń qoly jınalǵan. Bul da belsendi saılaý quqyǵyna ıe saılaýshylardyń 1 paıyzynan astamyn quraıdy.

Osylaısha 3 sáýirge belgilengen kezekten tys Prezıdenttik saılaýǵa kandıdat retinde tirkelgenderdiń sany 4 adamdy qurap otyr. Olar: «Nur Otan» Halyqtyq-demokratııalyq partııasy usynǵan Elbasy Nursultan Nazarbaev, Qazaqstannyń kommýnıstik halyqtyq partııasynyń hatshysy Jambyl Ahmetbekov, Qazaqstan Patrıottary partııasynyń tóraǵasy Ǵanı Qasymov jáne «Tabıǵat» ekologııalyq odaǵynyń tóraǵasy Mels Eleýsizov.

Esterińizge sala keteıik, Nursultan Nazarbaevty qoldap respýblıkanyń 16 óńirinen 717 myń 340 saılaýshynyń qoly jınalǵan. Bul belsendi saılaý quqyǵy bar azamattardyń 8 paıyzǵa jýyǵyn quraıdy. Al J.Ahmetbekovtyń kandıdatýrasyn qoldap, elimizdiń 15 óńirinen teńdeı ókildik etetin 96 myń 557 saılaýshynyń qoly jınalǵan. Bul belsendi saılaý quqyǵyna ıe saılaýshylardyń 1 paıyzynan astamyn quraıdy.

Aıta keteıik, bul kúnderi Prezıdenttikke úmitkerlerdiń ishinen zańger Sálim Óten, ekolog-ǵalym Musaǵalı Dýambekov, «Nur Islam» týrıstik fırmasynyń dırektory Qanat Týrageldıev, ýaqytsha jumyssyz Gúldana Toqbaeva, Jemqorlyqpen kúres qoǵamdyq komıtetiniń tóraǵasy Jaqsybaı Bázilbaev, «Jeltoqsan» qoǵamdyq birlestiginiń belsendisi Qurmanǵazy Rahmetov jáne jeke kásipker Serik Saparǵalı ózderin qoldaıtyn saılaýshylardyń qoldaryn jınaý ústinde. QR Saılaý týraly» konstıtýtsııalyq zańynyń 59-babynyń 5-tarmaǵyna sáıkes, Prezıdenttikke kandıdatty oblystardyń kem degende úshten ekisi, Astana jáne Almaty qalalarynyń atynan teńdeı ókildik etetin saılaýshylardyń jalpy sanynyń kem degende 1 paıyzy qoldaýy tıis. OSK qabyldaǵan qaýlyǵa sáıkes, úmitkerlerdi qoldaǵan jáne rastalǵan qoldardyń sany 91 myń 10 adamdy quraýy kerek. Qol jınaýdy prezıdenttikke kandıdattyń senim bildirilgen adamdary uıymdastyrady. Bul rette árbir qol qoıý paraǵynyń rettik nómiri bolýy kerek jáne onda kandıdattyń tegi, aty, ákesiniń aty, úmitkerdi qoldap qol jınaǵan senim bildirilgen adamnyń jeke qoly, tegi, aty jáne ákesiniń aty, qol jınaý júrgizilgen eldi mekenniń ataýy kórsetilýi tıis.