OSK elektrondy daýys berý júıesine aýysýdy qarastyryp jatqan joq
ASTANA.KAZINFORM – Saılaýda nemese referendýmda elektrondy daýys berý júıesin engizý qarastyrylyp jatqan joq. Bul týraly QR Ortalyq saılaý komıssııasynyń hatshysy Shavhat Ótemisov málim etti.
— Qazir kún tártibinde elektrondy daýys berý máselesi turǵan joq. Áriptesterimiz shetelge baryp, olardyń tájirıbesin baqylap júr. Jalpy, shetelde osy taqyrypty zerttep jatyr, - dedi ol.
Onyń aıtýynsha, qazir tek 40 el elektrondy nusqa paıdalanyp jatyr nemese synaqtan ótkizý satysynda.
— Keıbir elderde osyndaı úrdis baıqalyp otyr, ıaǵnı elektrondy daýys berýdi engizip, ony synaqtan ótkizgennen keıin, bas tartady. Statıstıkaǵa qaraǵanda, búginde 12 elde mundaı jaǵdaı boldy. Germanııa, Nıderlandy jáne Norvegııa osy tájirıbeni júzege asyrdy, sodan keıin odan bas tartty. Birinshi suraq - buǵan ne sebep boldy? Bul rette kıberqaýipsizdik máselesi kóterilip otyr, - dedi Sh. Ótemisov Parlamen palatalarynyń birlesken otyrysy kezinde tilshiler suraǵyna jaýap bere otyryp.
OSK hatshysy onlaın daýys berý kezinde kıbershabýyldar arqyly saılaýǵa aralasý qaýpi artatynyn sóz etti.
— Múldem bas tartamyz dep aıta almaımyn. Sonymen birge, osy júıeni usynýǵa asyqpaımyz. Atap aıtqanda, osy máselege qatysty normany Parlament qabyldaıty. Ortalyq saılaý komıssııasy zań shyǵarý bastamalaryna qatysa almaıdy, dedi ol.
Budan buryn habarlanǵandaı, búgin Parlament palatalarynyń birlesken otyrysynda «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zań jobasy birinshi oqylymda maquldandy.
