OSK EQYU/DIAQB-nyń kezekten tys Prezıdent saılaýyn baqylaýǵa qatysty №1 aralyq esebin bekitý týraly hattamalyq sheshim qabyldady
ASTANA. 24 naýryz. QazAqparat /Aıdar Ospanalıev/ - Búgin Ortalyq saılaý komıssııasy kezekti otyrys barysynda Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar jáne adam quqyqtary jónindegi bıýrosynyń 3 sáýirge taǵaıyndalǵan kezekten tys Prezıdent saılaýyn baqylaý jónindegi naýryzdyń 1-i men 14-i aralyǵyndaǵy №1 aralyq esebin bekitý týraly hattamalyq sheshim qabyldady.
Otyrys barysynda atalmysh qujatqa baılanysty sóz qozǵaǵan Ortalyq saılaý komıssııasynyń tóraǵasy Qýandyq Turǵanqulovtyń aıtýynsha, qujatty EQYU/DIAQB-y naýryzdyń 21-i kúni jarııa etti. «Qujat 12 bólimnen turady jáne onyń negizgi bóliginde saılaýdyń quqyqtyq bazasyna qysqasha sholý jasalǵan. Sondaı-aq qujat kezekten tys Prezıdent saılaýyna baılanysty ákimshilendirý júıesi, saılaýshylardy tirkeý, kandıdattardy usyný men tirkeý tártibi, buqaralyq aqparat quraldarynyń qyzmeti, azamattardyń aryzdary men shaǵymdaryn qaraý tártibi men protsedýralary, baıqaýshylar qyzmetiniń quqyqtyq negizderi sııaqty birqatar máselelerdi qamtıdy. Esep negizinen aqparattyq - beıtarap sıpatqa ıe. Onda Ortalyq saılaý komıssııasynyń saılaýǵa daıyndalý men ony ótkizý jumystaryn jaqsy júrgizip jatqandyǵy, sondaı-aq OSK-nyń turaqty túrde óziniń májilisterin ótkizip, ony qoǵamǵa barynsha ashyq etip uıymdastyryp júrgendigi aıtylǵan. Sondaı-aq osy eseptiń málimetteri boıynsha, OSK jýrnalıstermen saılaýǵa baılanysty turaqty brıfıngterdi de ótkizip, aqparattyq veb-saıtyna málimetter ornalastyryp otyrady»,-dedi OSK tóraǵasy.
Onyń sózinen qaraǵanda, halyqaralyq uıym mıssııasynyń esebinde saılaýdy uıymdastyrýshylardy oqytý, saılaýshylardy saılaýdyń ótetindiginen habardar etý maqsatynda júrgizip jatqan jumystary da jaqsy baǵalanǵan. «Esepte sarapshylardyń saılaýdy uıymdastyrýǵa baılanysty synı kózqarastary da jarııalanǵan. Olar lıngvıstıkalyq komıssııanyń jumysy men komıssııa ókilderiniń Prezıdenttikke úmitkerlerdiń memlekettik tildi bilý deńgeıin baǵalaýy, kandıdattardyń aqparat quraldaryna teńdeı qoljetimdiligin qamtamasyz etýi jáne aqparat quraldaryndaǵy kandıdattar týraly materıaldardyń jarııalanýy sııaqty san túrli máselelerdi qamtıdy. Aıta keterligi sarapshylar tarapynan berilgen synı baǵalardyń arasynda naqty faktilermen dáleldeýdi jáne saılaýǵa qatysty zańdar men halyqaralyq talaptardyń naqty baptaryna silteme jasap dáleldeýdi qajet etetin máseleler bar»,-dedi Q.Turǵanqulov.
