OSK delegatsııasy Majarstandaǵy parlamenttik saılaýdy halyqaralyq baıqaýǵa qatysty
ASTANA. KAZINFORM — QR OSK tóraǵasy Nurlan Ábdirov bastaǵan qazaqstandyq delegatsııa Majarstandaǵy parlament saılaýyna halyqaralyq baıqaý júrgizýge qatysty. Delegatsııa quramynda OSK tóraǵasynyń orynbasary Muhtar Erman boldy.
Jumys sapary aıasynda Ortsaılaýkom basshysy Majarstannyń Ulttyq saılaý bıýrosynyń prezıdenti Attıla Nadpen, Ulttyq saılaý komıssııasynyń prezıdenti Robert Shashvarımen ekijaqty kezdesý ótkizdi. Kezdesý barysynda taraptar eki memlekettiń ulttyq saılaý júıesiniń erekshelikteri, aldaǵy ekijaqty yntymaqtastyq sharalary týraly talqylady.
— Nurlan Ábdirov sheteldik áriptesterine respýblıkalyq referendýmnyń qorytyndylary jáne jańa Konstıtýtsııanyń negizgi qaǵıdattary týraly jan-jaqty aqparat usynyp, olardy aldaǵy Quryltaı depýtattaryn saılaýǵa halyqaralyq baıqaýshy retinde qatysýǵa shaqyrdy. Atap ótetin jaıt: taraptar arasyndaǵy yntymaqtastyq sharalary Qazaqstan men Majarstannyń saılaý organdary arasyndaǵy Ózara túsinistik týraly memorandým aıasynda júzege asyrylyp keledi. Atalǵan memorandýmǵa 2024 jylǵy 14 maýsymda qol qoıyldy, — delingen komıssııa habarlamasynda.
Sonymen qatar, Ortalyq saılaý komıssııasynyń tóraǵasy Amerıka Qurama Shtattarynyń saılaýǵa járdemdesý jónindegi komıssııa tóraǵasynyń orynbasary Donald Palmermen, Horvatııa, Latvııa, Lıtva, Estonııa, Túrkııa, Úndistan memleketteriniń ortalyq saılaý organdary basshylarymen jáne ókilderimen ekijaqty kezdesýler ótkizip, olardy aldaǵy ýaqytta Qazaqstanda ótetin parlamenttik saılaýǵa halyqaralyq baıqaý júrgizýge shaqyrdy.
OSK delegatsııasy Majarstannyń memlekettik aqparattyq saıasat salasyndaǵy birqatar mańyzdy jobamen tanysty. Atap aıtqanda, derekterdi qorǵaý jáne aqparat bostandyǵy jónindegi, medıa jáne aqparattyq kommýnıkatsııa jónindegi ulttyq organdardyń ókilderi osy saladaǵy tájirıbeler, elektoraldyq naýqan kezindegi kommýnıkatsııany basqarý, aqparat almasý boıynsha tanystyrylym jasady.
Sheteldik baıqaýshylarǵa arnalǵan jobalar tanystyrylymynda Ulttyq saılaý komıssııasy daýys berýdi uıymdastyrý tártibi týraly baıandady. Halyqaralyq baıqaý baǵdarlamasy sheńberinde OSK ókilderi Býdapesht qalasynda ornalasqan № 020 saılaý ýchaskesinde bolyp, daýys berý kúnine daıyndyqtyń sońǵy kezeńderimen tanysty.
12 sáýirde, ıaǵnı saılaý kúni OSK delegatsııasy Býdapesht qalasyndaǵy birqatar saılaý ýchaskelerinde bolyp, daýys berý barysyn, ýchaskelik saılaý komıssııalarynyń jumysy men saılaýshylardyń qatysý deńgeıin baıqady. Sondaı-aq, ýchaskelerdiń jabylýy men daýystardy sanaý protsesine qatysty.
Aıta keteıik, Majarstan parlamenti — Memlekettik jınalystyń jańa shaqyrylymyn saılaý 2026 jylǵy 12 sáýirde ótti. Onyń quramyna 199 depýtat kiredi. Majarstan aralas saılaý júıesin qoldanady: birmandatty okrýgter jáne ulttyq tizimder boıynsha. Majarstannyń saılaý júıesindegi erekshelik — daýys berý qaǵaz bıýlletender arqyly júzege asyrylady, elektrondyq daýys berý júıesi qoldanylmaıdy. Bul saılaýǵa Majarstan halqynyń 79,56 paıyzy daýys berýge qatysyp, joǵary belsendilik kórsetti.
Osyǵan deıin Qasym-Jomart Toqaev Peter Madıardy Majarstandaǵy parlament saılaýynda jeńiske jetýimen quttyqtady.
