OSK-da múgedektigi bar adamdardyń saılaý quqyǵyn qamtamasyz etý joldary qaraldy
ASTANA. KAZINFORM — Búgin QR Ortalyq saılaý komıssııasynyń janyndaǵy Múgedektigi bar adamdardyń saılaý quqyqtaryn qamtamasyz etý jónindegi jumys tobynyń otyrysynda saılaý quqyqtaryn tolyqqandy júzege asyrýǵa jaǵdaı jasaýǵa qatysty praktıkalyq máseleler talqylandy.
Vedomstvonyń baspasóz qyzmeti málim etkendeı, shara barysynda saılaý aldyndaǵy aqparatty alýdan bastap tikeleı daýys berýge deıingi barlyq kezeńder qarastyryldy.
Jumys tobynyń otyrysyna 100-den asa adam — Jumys tobynyń músheleri, Ortalyq jáne aýmaqtyq saılaý komıssııalarynyń músheleri, QR Eńbek jáne halyqty áleýmettik qorǵaý mınıstrliginiń, múgedektigi bar adamdardyń qoǵamdyq birlestikteriniń, saıası partııalardyń, TMD jáne EQYU DIAQB Saılaýdy baıqaý jónindegi mıssııalarynyń ókilderi qatysty.
Sondaı-aq, is-sharaǵa Braıl qarpimen jasalǵan sapaly ári qoldanýǵa yńǵaıly trafaretti ázirleýge eleýli úles qosqan sarapshylar da qatysty: Jumys tobynyń múshesi, QR Prezıdentiniń janyndaǵy halyqtyń áleýmettik jaǵynan osal sanattarynyń quqyqtary jónindegi ýákil Kenjeǵul Seıtjan, Nazarbaev Ýnıversıtetiniń assıstıvti tehnologııalar jáne aqparattyń qoljetimdiligi jónindegi sarapshy-menedjeri, múgedektigi bar adamdardy áleýmettik qorǵaý máseleleri jónindegi Úılestirý keńesiniń múshesi, EQYU DIAQB janyndaǵy múgedektigi bar adamdardyń saıası qatysýy jónindegi konsýltatıvtik keńestiń múshesi Zııat Abılkaımov jáne Astana qalasynyń zaǵıp jáne nashar kóretin azamattarǵa arnalǵan mamandandyrylǵan kitaphanasynyń braılıst mamany Nazıgúl Qasymbekova qatysty.
Budan buryn el boıynsha 1 333 saılaý ýchaskesi múgedektigi bar adamdarǵa tolyq beıimdelmegenin jazǵanbyz.
