OSK búgin ózge de memlekettik organdarmen birlesip daýys berýge baılanysty málimetterdi turaqty jarııa etip otyratyn boldy
ANA. 3 sáýir. QazAqparat /Aıdar Ospanalıev/ - «Elimizdegi barlyq saılaý ýchaskeleri ashylyp, kezekten tys prezıdent saılaýynda daýys berý sharalary jalǵasýda», -
dedi búgin Ortalyq saılaý komıssııasynyń hatshysy Baqyt Meldeshov jýrnalıstermen bolǵan brıfıngte.
Brıfıng barysynda ol buqaralyq aqparat quraldary ókilderin Ortalyq saılaý komıssııasynyń búgingi jumys kestesimen tanystyrdy.
Soǵan sáıkes, OSK ókilderi kezekten tys prezıdent saılaýynda daýys berýshiler jónindegi málimetterdi saǵat 10-30-da jarııa etetin bolady. «Biz tup-týra saǵat 10-00-de el aımaqtaryndaǵy saılaý ýchaskelerimen habarlasyp, málimetter jınastyramyz. Jarty saǵat kóleminde biz barlyq qajetti derekterdi jınaqtap úlgeremiz degen oıdamyn»,-dedi B.Meldeshov.
Sondaı-aq búgin kúni boıy Ortalyq saılaý komıssııasynyń músheleri jýrnalıstermen kezdesip, daýys bergen saılaýshylar jónindegi málimetterdi jarııa etip otyrady. «Búgin saǵat 22-00-de OSK tóraǵasy tolyq aqparat beredi. Bul kezdesýdiń birshama keshiktirilip otyrǵan sebebi elimizdiń keıbir aımaqtarynda Astanamen salystyrǵanda ýaqyt aıyrmashylyǵy bar», - dedi OSK hatshysy.
Onyń sózine qaraǵanda, kúni boıy OSK-nyń baspasóz ortalyǵynda tek OSK músheleri ǵana emes, Syrtqy ister jáne Іshki ister mınıstrligi men Bas prokýratýranyń ókilderi de brıfıng ótkizedi. Quqyq qorǵaý salasynyń ókilderi brıfıngte saılaý kúnindegi zańbuzýshylyqtar men qoǵamdyq tártippen baılanysty jaǵdaı jónindegi jedel málimetterdi berip otyrady.
