OSK: BAQ-ta foto jáne beınematerıaldardy paıdalaný úshin saılaý ýchaskesindegi adamnan kelisim talap etilmeıdi

NUR-SULTAN. QazAqparat – Buqaralyq aqparat quraldarynda foto jáne beınematerıaldardy paıdalaný úshin saılaý ýchaskesindegi adamnan kelisim talap etilmeıdi. Bul týraly Ortalyq saılaý komıssııasynyń otyrysynda komıssııa múshesi Serik Sydyqov aıtyp ótti, dep habarlaıdy QazAqparat tilshisi.

Serik Sydyqovtyń aıtýynsha, saılaý ýaqytynda jumys júrgizý úshin buqaralyq aqparat quraldarynyń ókilderine jeke kýáligi men redaktsııanyń tapsyrmasy ǵana kerek. «BAQ týraly» zańnyń 14-babynyń 1-1-tarmaǵyna sáıkes buqaralyq aqparat quraldaryna materıaldardy daıyndaý, jarııalaý, qaıta shyǵarý jáne taratý kezinde mynadaı jaǵdaılarda beınelenetin adamnyń kelisimi talap etilmeıdi:

- eger osy adam oıyn-saýyq mádenı-buqaralyq, mádenıet salasynda áleýmettik mańyzy bar, sporttyq-buqaralyq is-sharalarǵa, beıbit jınalystarǵa jáne ózge de jarııa is-sharalarǵa qatyssa nemese aralassa;

- eger taratylatyn aqparatta adamnyń beınesi jáne osy adamnyń qyzmettik jáne jarııa qyzmetine baılanysty málimetter qamtylsa, ony adamnyń ózi, onyń zańdy ókili nemese ýákiletti adam qoljetimdiligi shektelmegen kózderde jarııalasa.