OSK «Aýyl» partııasynyń partııalyq tizimin tirkedi
«Aýyl» partııasy 25 adamnan turatyn partııalyq tizimdi usyndy. Bul tizimde 10 kandıdat: áıelder, jastar jáne múgedektigi bar adamdar. Olar kandıdattardyń jalpy sanynyń 41 paıyzyn quraıdy. Ortalyq saılaý komıssııasy ókiletti memlekettik organdarmen birlesip, Májilis depýtaty bolyp saılaný úshin partııalyq tizimge engizilgen adamdardyń Konstıtýtsııa men «Saılaý týraly» Konstıtýtsııalyq zańnyń talaptaryna sáıkestigine tekserý júrgizdi. Partııalyq tizimge engizilgen barlyq adam Konstıtýtsııanyń jáne «Saılaý týraly» Konstıtýtsııalyq zańnyń talaptaryna sáıkes keledi», - dedi OSK múshesi Asylbek Smaǵulov.
Onyń atap ótýinshe, partııalyq tizimdi usynǵan partııalar partııalyq tizimge engizilgen árbir adam úshin QR zańnasynda belgilengen eń tómengi jalaqynyń 15 eselengen mólsherinde OSK shotyna saıası partııalardyń qarajatynan saılaý jarnasyn engizedi.
«Parlament Májilisi depýtattarynyń aldyńǵy saılaýynda daýys berýge qatysqan saılaýshylardyń 5 jáne odan da kóp paıyz daýysyn alǵan saıası partııalar saılaý jarnasyn tólemeıdi. 2021 jylǵy qańtarda ótken Parlament Májilisi depýtattarynyń saılaýynda «Aýyl» partııasy saılaýshylar daýysynyń 5,29 paıyzyn alǵan. Osyǵan baılanysty «Aýyl» partııasy saılaý jarnasyn tóleýden bosatylady», - dedi ol.
Osydan keıin Ortalyq saılaý komıssııasynyń músheleri «Aýyl» partııasy qoǵamdyq birlestiginen Parlament Májilisi depýtattyǵyna kandıdattardyń QR Konstıtýtsııasynda jáne «Saılaý týraly» Konstıtýtsııalyq zańda olarǵa qoıylatyn talaptarǵa sáıkestigin anyqtaý týraly, Aýyl partııasynyń partııalyq tizimin tirkeý týraly hattamalarǵa qol qoıdy.
«Aýyl» partııasy atynan partııalyq tizim boıynsha túsetin kandıdattarmen myna jerde tanysýǵa bolady.