OSK Amantaı qajy Asylbekti QR Prezıdenttigine kandıdat retinde tirkeýden bas tartty
ASTANA. 21 aqpan. QazAqparat /Asqar Bımendın/ - Búgin QR Ortalyq saılaý komıssııasy lıngvıstıkalyq komıssııanyń emtıhanyna úsh ret kelmeı qoıǵan Amantaı qajy Asylbekti QR Prezıdenttigine kandıdat etip tirkeýden bas tartý týraly qaýly qabyldady.
Ortalyq saılaý komıssııasy kezekti otyrysyn ótkizip, Amantaı qajyny kandıdattar tizimine qosýdan bas tartý týraly qaýly qabyldady.
Qaýlynyń jobasyn tanystyra otyryp, QR OSK hatshysy Baqyt Meldeshev: «Amantaı qajy, aldyn ala eskertkenimizge qaramastan, lıngvıstıkalyq komıssııanyń otyrysyna eki ret kelgen joq. BAQ arqyly buny ózi de rastady. Keshe biz saǵat 16.00-ge sońǵy ret otyrys belgiledik, alaıda, ol taǵy da kelmedi. Qaýlyny (bas tartý týraly) qoldaýlaryńyzdy suraımyn», - dep atap ótti.
«QR Prezıdenttiginen úmitker Amantaı qajy Asylbektiń lıngvıstıkalyq komıssııa otyrysyna kelmeýine baılanysty, onyń QR Konstıtýtsııasy men «QR-daǵy saılaý týraly» Konstıtýtsııalyq zańnyń talaptaryna sáıkes ekendigi, atap aıtqanda, memlekettik tildi erkin meńgergendigi anyqtalǵan joq», - degen qorytyndymen OSK barlyq músheleri biraýyzdan qaýly jobasyn qabyldady.
«Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańynyń 54-babyna, 59-baby 7-tarmaǵynyń 3) tarmaqshasyna sáıkes jáne Qazaqstan Respýblıkasy Ortalyq saılaý komıssııasyna kelip túsken qujattardyń negizinde Qazaqstan Respýblıkasy Ortalyq saılaý komıssııasy QAÝLY ETEDІ:
1. Qazaqstan Respýblıkasynyń Prezıdenttigine kandıdat Amantaı Hantemiruly Asylbektiń lıngvıstıkalyq komıssııanyń otyrystaryna kelmeýine baılanysty onyń Qazaqstan Respýblıkasy Konstıtýtsııasynyń jáne «Qazaqstan Respýblıkasyndaǵy saılaý týraly» Qazaqstan Respýblıkasy Konstıtýtsııalyq zańynyń memlekettik tildi erkin meńgerý bóligindegi talaptaryna sáıkestigi anyqtalmady dep atap kórsetilsin.
2. Amantaı Hantemiruly Asylbekti Qazaqstan Respýblıkasynyń Prezıdenttigine kandıdat retinde tirkeýden bas tartylsyn", - delingen qaýlyda.
