Ósimdikterdi zııankesterden qorǵaýda bıologııalyq ádisti qoldaný sýbsıdııalansa ıgi - R. Halmuradov
ASTANA. 11 mamyr. QazAqparat /Qanat Mámetqazyuly/ - Ósimdikterdi zııankesterden qorǵaýda bıologııalyq ádisti qoldanýdy memleket tarapynan sýbsıdııalaý máselesi sheshimin tapsa ıgi. Búgin QR Parlamenti Májilisiniń jalpy otyrysynda Aýyl sharýashylyǵy mınıstriniń atyna depýtattyq saýal joldaǵan depýtat Rozaqul Halmuradov osy máseleni kóterdi.
«Jyl saıyn Ońtústik Qazaqstan oblysynda 400-450 myń tonna maqta-shıkizaty jınalady. Al álemdik naryqta maqta talshyǵy baǵacy joǵarylaýda. Soǵan qaramastan respýblıkamyzdaǵy maqtanyń ónimdiligi tómen kúıinde qalyp otyr. Onyń negizgi sebepteriniń biri maqtanyń zııankestermen kóptep zalaldanýynda», - deıdi depýtat. Onyń aıtýynsha, qazirgi tańda ońtústiktiń maqtashylary zııankestermen kúreste hımııalyq tásildi kóptep qoldanyp otyr. Al damyǵan elderde zııankesterge qarsy hımııalyq tásil az paıdalanady nemese tipten qoldanylmaıdy.
«Búgingi tańda maqtalyq alqaptarda ýly hımııalyq preparattardy qoldanýdyń kún sanap artýy jergilikti turǵyndardyń alańdaýshylyqtaryn týdyrýda. Qorshaǵan ortanyń lastanýy, adamdardyń preparattardy qoldanýda ýlanýy, pestıtsıdterdiń qaldyq áserinen óndirilgen ónimde saqtalyp qalýy ár túrli onkologııalyq, allergııalyq jáne basqa da aýrýlardy týyndatyp adam densaýlyǵyna qaýip tóndirýde. Osyǵan baılanysty maqtany zııankesterden qorǵaýda bıologııalyq sharalar sekildi balamaly ádisterdi qoldanýdyń ózektiligi joǵarylap otyr», - dedi R. Halmuradov. Onyń sózine qaraǵanda, keltirilgen sebepterge baılanysty qazirgi tańda ósimdik qorǵaýda bıologııalyq ádis dúnıejúzi boıynsha basymdylyqqa ıe bolyp otyr. Al, elimizde bul ádis damymaı, kerisinshe aıtarlyqtaı artta qalǵan.
«Sondyqtan, QR Aýyl sharaýshylyǵy mınıstrligi Ońtústik Qazaqstan oblysynyń sýarmaly eginshilik aımaqtarynda ósimdik zııankesterine qarsy bıologııalyq ádisti qoldaný men damytýǵa qatysty is-sharalar josparlap, uıymdastyrsa ıgi. Eń bastysy, ósimdikterdi zııankesterden qorǵaýda bıologııalyq ádisti qoldanýdy memleket tarapynan sýbsıdııalaý máselesi sheshimin tapsa, osy qolǵa alynsa eken», - dedi depýtat.
