Ósimdikter dúnıesi týraly zań jobasy ázirlendi
NUR-SULTAN. QazAqparat – Mınıstrlik Ósimdikter dúnıesi týraly zań jobasyn ázirledi. Onyń sheńberinde ósimdikter dúnıesi resýrstaryn qorǵaý, molyqtyrý jáne paıdalaný jónindegi barlyq máseleler zańnamalyq turǵyda retke keltirý, oǵan jaýapty memlekettik organdardy aıqyndaý kózdelýde. Bul týraly Úkimet otyrysynda Qazaqstan Respýblıkasynyń Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.
«Ósimdikter dúnıesin saqtaý máseleleri Orman kodeksimen ǵana jáne tek memlekettik orman qory aýmaǵynda nemese jalpy kólemi 2,5 mln gektar bolatyn el aýmaǵynyń nebary 11%-y retteledi. Al aýyl sharýashylyǵy maqsatyndaǵy jerler bosalqy jerler jáne ónerkásip jerleri sııaqty basqa sanattardaǵy jerler boıynsha bul máseleler rettelmegen. Osyǵan baılanysty mınıstrlik Ósimdikter dúnıesi týraly zań jobasyn ázirledi. Onyń sheńberinde ósimdikter dúnıesi resýrstaryn qorǵaý, molyqtyrý jáne paıdalaný jónindegi barlyq máseleler zańnamalyq turǵyda retke keltirý, ósimdikter dúnıesi resýrstaryn saqtaýǵa jáne molyqtyrýǵa jaýapty memlekettik organdardy aıqyndaý kózdelýde», - deıdi QR Ekologııa, geologııa jáne tabıǵı resýrstar mınıstri Maǵzum Myrzaǵalıev.
Onyń aıtýynsha, ósimdikter dúnıesiniń esebin memlekettik kadastr men monıtorıngin júrgizý, sondaı-aq botanıkalyq korrektsııalar men ósimdikterdiń genetıkalyq resýrstary kollektsııalaryn jasaý jáne ustaý tártibin aıqyndaý kózdelýde.
«Budaı basqa, ósimdikterdiń sırek kezdesetin jáne quryp ketý qaýpi tóngen túrlerin saqtaý máseleleri retteletin bolady. Memleket basshysynyń tapsyrmalaryn sapaly ári ýaqytynda oryndaý maqsatynda oblys ákimdikterine kelesideı tapsyrma berýdi suraımyn: rmandardy molyqtyrý men orman ósirý kólemin ulǵaıtý boıynsha júktelgen josparly kórsetkishterdi oryndaý, qurylǵan orman ekpeleriniń ýaqytyly ustalýyn qamtamasyz etý, qalalar men basqa eldi mekenderdegi jasyl jelekter boıynsha pasporttandyrý boıynsha jumys júrgizý. Sonymen qosa, Qarjy mınıstrligi respblıkalyq bıýdjet sheńberinde óńirler men basqa da memlekettik organdardyń ormandardy molyqtyrý men ormannyń ósý kólemin ulǵaıtýdy qamtamasyz etý úshin qarjylandyrý máselelerin pysyqtaý qajet», - deıdi ol.
