Ósimdik jáne mal sharýashylyǵyndaǵy sýbsıdııalaý jalǵasady - Saparhan Omarov
«Bıyl jalpy aýyl sharýashylyǵy óniminiń ósimin 105 paıyzǵa, tamaq ónimderi óndirisiniń ósimin 107 paıyz deńgeıinde qamtamasyz etý josparlanyp otyr. Atalǵan josparly ındıkatıvter ishki naryqty áleýmettik mańyzy bar azyq-túlik taýarlarymen molyqtyrý jáne agroónerkásiptik keshenniń básekege qabilettiligin arttyrý esebinen qamtamasyz etiletin bolady. Bul úshin agroónerkásiptik keshen sýbektilerin memlekettik qoldaý, onyń ishinde ınvestıtsııalyq sýbsıdııalaý jáne basqa da qarjy quraldary, ósimdik sharýashylyǵy men mal sharýashylyǵyndaǵy sýbsıdııalaý jalǵasatyn bolady», - dedi mınıstr.
Onyń aıtýynsha, osy maqsattarǵa bıyl 300 mlrd teńgeden astam qarjy baǵyttalady.
«Іri 7 ekojúıe qurý jónindegi tapsyrmaǵa sáıkes Soltústik Qazaqstan oblysynda qýaty 300 myń tonna bolatyn dándi daqyldar, Aqmola oblysynda qýaty 200 myń tonna bolatyn maıly daqyldar, Aqtóbe oblysynda 20 myń tonna, Almaty oblysynda 15 myń tonna bolatyn et óndiretin jáne óńdeıtin ekojúıeler qurý jónindegi ınvestıtsııalyq jobalar iske asyrylatyn bolady», - dedi S. Omarov.
